Fut una giobia cussu 8 de Santu Aine de su 1942! Anna s’agataiat in Osile, aunia iat sighiu su pobiddu Perdu Pillonca chi trabagliaiat comenti de forestali. Osile Mannu ddi naraiant ca tandu contaiat prus de cincumila abitantis. E de importu mannu fut cussa bidda, ca teniat storias de contai.

De una dì a un’atra depiat nasciri unu pipiu. O forsis una pipia? Tandu non ci furint ecografias e tocaiat a aspetai finas a s’acabu de totu po connosciri eita erribaiat. Cali su sentidu de is dus? Perunu, feti saludi. Nascit Pàulu, in saludi manna, funt allirugus aici Perdu e Anna. Si narat ca a is pipius, po totu vida, abarrit in is ogus e in calencuna parti de su ciorbeddu is primas cosas chi bint e chi intendint. A Pàulu po totu sa vida dd’abarrat su nuscu, is saboris e is sonus de custu logu. Fut sa bidda sua, cussa chi teniat massimamenti in su coru e dogna borta chi ddue torraiat s’intendiat in domu.

Atras biddas puru teniat in is intragnas: Orgosolo, Seui (aunia est interrau e aunia at biviu po annus meda), Arzana, Sedilo, Biddanoa Monteleone, ma peruna si podiat acostiai a Osile Mannu.

In is annus Pàulu, giornalista, scritori e poeta est intrau in su coru e in sa conca de totus, po su trabagliu chi at fatu. Fut omini bonu, spassiosu, brullanu e de principius sanus. Boliat beni a is pastoris, a is massajus, a is poetas improvisadoris e de taulinu e a is cavalieris de s’Ardia. At intregau sa vida sua, cun cussa pinna chi sciat manigiai comenti pagus, a s’amori po sa Terra sua, a sa limba e a unu benidori de sa Sardigna: dda boliat non prus de serbidora ma meri.

Feti una cosa, ma forsis sa prus de importu mannu, nos at imparau: su fueddu donau e sa strinta de manu contant prus de dogna atra cosa. Pàulu fut aici, non traigiat a nemus e no at mai bendiu is ideas suas.

Nos at amostau un’andala, cussa prus dificili de sighiri ma sa prus galana: podiri castiai a totus in is ogus cun mirada segura. Teneus una spera, sa prus manna chi si podit tenni: portai a innantis cussu chi nos as imparau.

Augurius mannu, Pàulu Pillonca, in cale chi siat logu sias.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: Archivio Domus de Janas