Si podit andai a votai finas a is tres de merì in Sardigna, po decidiri is aministratzionis de norantotu biddas e citadinas. Depiant essiri centu e dus, ma in Gonnoscodina, Seneghe, Sorgono e Zerfaliu no ant presentau peruna lista.
A is undixi de merì de eriseru, funt andaus a votasi su 45,43% de cussus chi ndi tenint diritus. Unu numuru meda prus basciu de cussu de is aministrativas de su 2016, ma est a nai ca tandu si votaiat feti in d’uan dì.
In is tres citadis cun prus de cuindiximila abitantis, Terranoa, Carbonia e Cabuterra funt andaus ancora prus in pagus: in Terranoa su 44,50%, in Carbonia su 41,60% e in cabuderra su 41,79%.
Funt, a dogna manera, paricius is cumunus chi tenint giai su sindigu, chena depiri aspetai, ca s’unica cosa chi contaiat fut su quorum: in sa provincia de su Sud Sardigna, in Barrali su sindigu est un’atra borata Faustu Piga, in Decimoputzu Antonino Munzittu, chi torrat sindigu a pustis cunidixi annus, Sant’Andria Frius est Simoni Melis, in Selegas Alessiu Piras, in Turri Mateu Pischedda, in Villaperuccio Marcellinu Piras, in Bidda de Sartu Lionardu Usai. In sa provincia de Aristanis teneus sindigu nou in Baradili, Maria Anna Camedda, in Borarcado Annalisa Mele,, in Marrubiu Luca Corrias, in Iscanu Antoni Flore. In sa provincia de Nugoro, Mauritziu Cadau est su sindigu nou de Brebì, Tore Ghisu de Borore, Franciscu Màriu Peddio de Gadoni, Alisandru Luche de Loculi, Ilenia Vacca de Ovodda, Giuanni Perdu Arca un’atra borta de Silanus, Christian Loddo de Talana e Anna Assunta Chironi de Triei.
In sa provincia de Tatari: Franciscu Ledda est su sindigu nou de Alà, Franciscu Dui de Ardara, Giuannina Fresi de Monteleone Rocca Doria, Fideli Tolu de Muros e Migheili Carboni de Nughedu San Nigolò.
Augurius mannus a is sindigus e a is biddas totus. Sa spera est chi pongiant su sardu e s’identidadi sarda in pumus artus.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.facebook.com/photo.php?fbid=10222987320844013&set=pb.1008962815.-2207520000..&type=3
