S’allirgat su centrumanca, is Steddaus perdint is sindigus chi teniant, ma funt a su costau de su Partidu Democratigu in is vitorias de Napoli e Bologna, su centrudrestra bincit is regionalis de sa Calabria e sa spera insoru est cussa de is ballotagius de su 17 e 18 de Santu Aine.

Ma prus che atru is aministrativas de dominigu e lunis passau ant amostau chi sa genti est cuasi orroscia de andai a votai: feti su 54,69 ddu at fatu e in totu is citadis mannas prus pagu de su 50%.

Tres de is cincu citadis prus mannas funt andadas a su Pd inderetura. In Milanu sighit a fairi su sindigu Giusepu Sala, e po sa prima borta su centrumanca bincit chena abbisongiu de torrai a votai. Su sindigu pigat su 57,73% de is votus, indenanti de Luca Bernardo de su centrudrestra cun su 31,97%. Giuanniluisu Paragone pigat su 2,99% e giumpat sa steddada Layla Pavone chi si frimat a su 2,7%. Su Pd, sempiri in Milanu, pigat tres bortas tantis is votus de sa Lega: non ddu podit scumponni Salvini!

In Bologna puru pagu de fairi: Mateu Lepore si pigat su 61,9% de is votus lassendu Fabiu Battistini a su 29,64%.

Ancora peus, massimamenti po Salvini, Meloni e Berlusconi, est andada in Napoli, aunia Pd e Steddaus si funt presentaus paris: Gaietanu Manfredi pigat su 62,9 de is votus e Catello Maresca, invecias, feti su 21,87%. Su sindigu beciu de sa citadi, Antoni Bassolino, si frimat a s’8,19 e erribat a innantis de Alisandra Clemente, sa candidada agiudada de Luisu De Magistris, sindigu finas a imoi, chi pigat su 5,58% de is votus.

S’at a torrai a votai, invecias, in atras duas citadis mannas che Torinu e Roma. In Torinu partit a innantis su candidau de su Pd Stevini Lo Russo cun su 43,86% in denanti de Damilano chi tenit su 38,9. In Roma parit prus oberta sa partida: Michetti, de su centrudrestra, partit a innanti de tres puntus cun Gualtieri: 30,15% contras su 27,03%.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.famigliacristiana.it/articolo/elezioni-la-vittoria-del-centrosinistra.aspx