A una cida de sa torrada eletorali po fairi su sindigu nou, in Pauli, sa coalitzioni de Bolentina Picciau s’ammanniat. Sa candidada sindiga, chi in sa torrada de unu s’est frimada a su 21,5% de votus si dd’at a biri cun su sindigu de is urtimus cinc’annus, Tomasu Locci, chi invecias at pigau su 40,2%. Picciau tenit sa spera de cuberai e giumpai a Locci.
Giai de sa dì a pustis, unu de is candidaus chi at perdiu, Efisiu Sanna, at nau ca fut a dispositzioni po donai is votus sus a sa Picciau. Duncas, in prus de is listas de su cumentzu de Bolentina Picciau (est a nai Pauli Monserrato, La Svolta-Progressisti, Steddaus e Unius po Pauli) s’aciungint is tres fortzas chi furint cun Sanna: Partidu democratigu, Cultura est libertadi e Immoi Sardigna. Insoma, un’atru Campu largu, comenti cussu chi at permitiu a Massimu Zedda de binciri in Casteddu, a Giusepu Mascia de ddu fairi in Tatari e Arremundu Cacciotto de binciri in Salighera. Ma, no est de scaresciri ca finas Alissandra Todde, cun su matessi campu largu at bintu sa torrada eletorali de is Regionalis in su mesi de friargiu.
“Sa torrada eletorali de s’8 e su 9 de làmpadas at nau ca su 60% de chini est andau a votai non pensat de sighiri sa politiga fata finas a immoi de s’aministratzioni de Locci”, narant cussus chi agiudant a Bolentina Picciau in dd’unu paperi amostau a is giornalistas: “S’area democratiga de Pauli s’est posta a dispostizioni de Picciau. S’est chistionau, de una parti e de s’atra, de programas intru de sa coalitzioni nosta cun cussa ghiada de Efisiu Sanna. Totu lassat creiri ca intru de is duas partis s’est agatada sa cuadra po ponni a innantis is esigentzias de is citadinus. Sa politiga chi si bolit portai a innnatis est sa matessi de is duas partis e duncas Sanna at a agiudai a Bolentina Picciau chena perunu problema”.
Màuru Mura
Dominigu, su seixi de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.sardegnaturismo.it/it/esplora/monserrato
