“Est tropu arriolau de cussu chi dd’est sussedendu, su presidenti de sa Regioni narat cosas in pissu de sa Sanidadi chi, de seguru, non funt de sa Sardigna: contat de unu benidori chi pensat feti cussu, ma chena arrespundiri a is problemas chi dogna dì tenint dotoris, infermieris, malaidus e is familias insoru”.
Est custu, in pagus fueddus, cussu chi pensant is consiglieris regionalis de is Progressistas in pissu de sa situatzioni de sa Sanidadi sarda contada de su guvernadori Christian Solinas, chi at nau, intru de mesu de totu, ca in Sardigna, cun su Covid puru, andat totu beni e ca imoi, finas a su 2023, ant essi ocupaus a trabagliai in cincumila.
“Est craru – sighint a nai is Progressistas – ca nemus podiat feti pensai a custa pesta, est craru puru ca problemas medas tenint s’arreiginis in is annus passaus, nosu seus is primus chi tenint cosa de nai ca is riformas si funt fatas prus po is cadiras de calencunu invecias de pensai a is malaidus, est giustu arregodai a su presidenti de sa Regioni, ca est su solu in su mundu, in prena pesta, a bolli fairi una riforma, chi ancora non balit, chi at frimau totu su sistema”.
E galu: “Is problemas funt medas comenti cussu de depiri dividiri is cadiras a is partidus chi cumandant, sa serrada de is spidalis prus piticus chi faint fuiri sa genti de is biddigeddas, sa mancantzia, in biddas medas, de su dotori, sa dificoltadi de podiri fairi e atru puru. Iat fairi beni su presidenti a ascurtai totu is campanas chi erribant de dogna parti de s’Isula. O ancora meglius iat depiri ascurtai is consiglieris chi ddis setzint a su costau, chi non perdint ocasioni in is atobius in Consigliu o in Comissioni, de donai curpas po comenti si aprontat sa Sanidadi sarda. De parti nosta, ddu naraus comenti eus sempiri fatu in custus annus, seus prontus a donai una manu de agiudu comenti issu e totu pedit: s’interessu nostu est a connosciri una Sanidadi chi funtzionit e chi siat acanta a totu sa genti. De seguru seus contras a custu sistema, chi divit feti cadiras”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: http://www.regione.sardegna.it/j/v/2568?s=413039&v=2&c=286&t=1
