“A pustis su calori meda de is urtimas dexi dis de su mesi de maju e de totu sa segunda parti de cussu de làmpadas, nosi agataus a depiri biviri sa de tres in custas dis e in cussas benidoras. Sa chistioni est sempiri sa matessi: sa parti de mesania e ocidentali de s’Europa est s’orruga, chi su paris de calori a suta tropicali chi bessit de s’Africa de sus, at sceberau, Su paris de arias caglientis funt is responsabilis de averas e funt lamadas in ingresu ‘Heat Domes’, chi in italianu funt ‘Cupole di calore’”, custus funt is fueddus de Larentu Tedici, metereologu capu de iLMeteo.it, chi nosi scoviat sa torrada de sa basca africana, chi de cras mercuris otu de làmpadas at a lompiri. S’ant a tenni temperadus chi de trintaseti gradus erribant finas a coranta e de prus puru.
E, po cantu pertocat is previsionis, sa Sardigna at essi una de is regionis aunia su termometru at a bessiri de prus: “A intru de su fini de cida – narat sempiri su metereologu – s’ant a amostai is coranta gradus in Sardigna, massimamenti in Aristanis, e is trintanoi in Puglia e Toscana”.
Ma, acingit Larentu Tedici, “in is dis benientis eus a tenni trintotu gradus in su Pranu Padanu e finas trintanoi in mesu de su paris intru de s’Emilia e sa Lombardia de giossu. In Roma, a intru de dominigu, ant essi trintases in s’umbara e eus abarrai aici po totu sa cida. In Milanu, dapoi de is trintotu gradus de cras, ant a calai de pagu, ma su peus est ca su noti at essi un’inferru”.
“In pagus fueddus, acabbat de nai Tedici, chi sa torrada de su calori at a essiri in dis benidoras, non poneus a un’ala sa pensada chi su peus at a lompiri de dominigu chi benit. Eus a controllai custa basca cun sa spera chi is modellus faddant. Po immoi sa previsioni est ca finas a su 22 e 23 de custu mesi at essi, po s’Italia, de calori mannu”.
Foto: https://www.ilmeteo.it/notizie/meteo-temperature-imminente-ondata-di-calore-sullitalia-da-mercoled-picchi-fino-a-3839c-al-nord-074001
