A castiai sa tassa mesu prena si podit nai ca su Casteddu at allonghiau de unu puntu cunfroma a s’Empoli. Ma feti custu. Invecias sa tassa mesu sbuida est feti in cussu chi podiat sussediri bincendu sa partida de eriseru: iat airi allonghiau de averas cun dogna scuadra, poita nemus at bintu e dognuna truma at paregiau: su Lecce cun sa Roma, s’Udinese cun su Sassuolo e su Frosinone in Genova cun is piciocus de Gilardino. Ma a sighiri sa tassa mesu prena est a nai puru ca a su Casteddu est finas e andada beni. Difatis su Vwerona no nd’at furau nudda ca at fatu una partida comenti depiat e tocat a torrai gratzias a Scuffet ca at frimau a innantis a Folorunsho e dapoi a Lazovic, ca chi nde chi no Ranieri fut prangendu un’atra partida perdia e un’atra ocasioni sprecada. Ma sa bocia, giai si scit, est aici: una partida chi pariat perdia est stetia torrada a ponni in peis e a s’acabbu s’est erriscau de dda binciri puru, ca chi non fut de Montipò, su portieri de su Verona, cussu tiru de punta de pei de Luvumbo ci podiat imbucai. Immoi su Casteddu s’agatat sempiri a dus puntus de sa zona caglienti, chi est ocupada paris de su Frosinone e de s’Empoli. Ma sa classifica est curtza de averas e in cincu puntus s’agatant seti scuadras chi ant a gherrai finas a s’urtima giorronada po non ci calai in Serie B. Po immoi sa sola chi est spaciada est sa Salernitana, chi cun catodixi puntus aspetat feti sa matematica po saludai sa Serie A.
Cussu chi fait a timiri a is tifosus funt massimamenti is tres partidas benientis, una prus tostada de s’atra: dominigu a is ses de merì cun s’Atalanta in domu; dapoi cun s’Inter in Milanu e in segus cun sa Juventus in Casteddu etotu. Aici a ddas biri e pensendu a su campionau giogau finas a immoi funt tres partidas in is calis s’erriscat de non fairi mancu unu puntu. Nosu teneus fidi, ca nd’eus bidu medas, e ddu scieus ca sa bocia, mai comenti immoi, est tunda e podit arregalai spantus.
Màuru Mura
Martis, su dus de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=423A7o6Rlds
