Unu Casteddu piticu de averas perdit sa partida de cuatru, de sighiu, in s’Unipol cun sa Latzio. A pustis su Frosinone, su Torinu e sa Roma, finas sa scuadra de Sarri non ci ponit meda a binciri. Tres funt is bocias chi Scuffet, chena peruna curpa est a nai, nd’at boddiu a is palas suas. Sa sola nova noa po is casteddaius est su gol spantosu de Gaetano chi at fatu bisai un’atra bortulada, a pustis cussas cun su Frosinone e cun su Sassuolo. Ma custa bia no est andada aici. Su Casteddu est partu pagu cosa e immoi tocata s’arriolai po su benienti. Giai dominigu un’atra partida de importu cun s’Udinese, foras de domu e dapoi atras duas partideddas chi is piciocus de Ranieri non podint faddiri: a innantis cun su Napoli de Mazzarri e in segus cun s’Empoli de Nicola. Su matessi Empoli de candu at mudau s’allenadori (cun Davidi Nicola a su postu de Andreazzoli, at cumentzau a curriri e in cuatru partidas at fatuo tu puntus. Eris ce dd’at fata a binciri in Salerno, chi est immoi sa sola scuadra a is palas de su Caseddu. Ranieri, po cussu chi at nau su presidenti Giulini a s’acabbu de sa partida, si ndi boliat andai, ma is giogadoris ddu ant pregau de abarrai e aici at fatu.
Is curpas non funt de issu, ca sa scuadra parit posta mali giai de su cumentzu de su campionau, forsis is tifosus si funt illudius de s’acabbu de campionau de ocannu passau. A chini massiat de fubalu ddi parit ca calencunu de is piciocus de Ranieri in sa serie A non possant giogai e is comporas de s’istadi passada immoi paritn faddias. Ma tandu totus naraiant ca funt giogadoris bonus. Ranieri est su solu chi possat sarvai su Casteddu de sa serie B, aici narat finas Giulini, ma giai de dominigu depit torrai a fairi puntus ca is scuadras chi funt gherrendu si funt ponendu a curriri. Fidi, tocat a tenni fidi. E spera manna.
Màuru Mura
Sabudu, su dexi de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=1Lr7YGjN40E
