No est in pissu de su podiu, ma si ddue acostiat meda: su sindigu de Casteddu Massimu Zedda arresurtat du de cuatru in sa classifica Governance Poll 2026, posta in peis de Noto Sondaggi e posta in is paginas de su “Il Sole 24 Ore”. Po su primu citadinu de sa capitali sarda s’agradessimentu si ndi pesat. E passat de su 60,3% de sa torrada eletorali chi at bintu a su 63% de custa cica. A cumandu de custa classifica s’agatat sa sindiga de Firentze Sara Funaro, cun su 66% de s’agradesismentu, sighia de su sindigu de Ascoli Picenu Marcu Fioravanti, cun su 65%, in su mentris chi in s’urtimu postu de su podiu si ddu est postu a cumandu su sindigu de Napoli, Gaietanu Manfredi.
Chi Zedda caminat in is primus postus, e parit chi is casteddaius agradessant meda cussu chi est fendu, po agatai su segundu sardu abbisongiat a calai finas a su postu de dixiotu, aunia si stagliat su sindigu nugoresu Emilianu Fenu chi passat de su 63,1% de sa torrada eletorali de ocannu passau a su 57,5% de custa cica. Est a nai ca calat de 5,6 puntus in percentuali. A su postu de bintiseti, invecias, s’agatat Giusepu Mascia de Tatari chi, a dogan manera godangiat agradessimentu: in su 2024 iat bintu cun su 51,1% e immoi est bessiu de prus de cuatru puntus cun su 55,5%.
Po cantu pertocat is Guvernadoris, sa presidenti de sa Regioni Sardigna Alissandra Todde est a su postu de catodixi, in pissu de dixiaseti poita non benint pigaus in cunsideru is spresidentis de sa Baddi de Aosta e de su Trentinu poita non benint postus de sa genti. Todde, a dogna manera, cunforma a ocannu passau, aunia teniat su 46,5 de agradessimentu, e de candu at bintu sa torrada eletorali cun su 49% de is votus, si pesat de 3,6 puntus lompendu a su 49%.
“Est un’allirghia chi ponit in is pumus artus sa fidi de is citadinus in sa Presidenti po mori de su trabbagliu mannu chi s’aministratzioni regionali est fendu”.
Foto: https://www.comune.cagliari.it/portale/it/persona.page?contentId=PRS180815
