Adriano Reginato nascit in Carbonera, in su Veneto, su 19 de mesi de Idas de su 1937. Ddi pragiat a giogai a fubal e ddi pragiat massimamenti a fairi su portieri. Ddu pesat su Treviso e is primus partidas si ddas giogat in serie C. De su Treviso fait unu sartu mannu andendu a giogai in su Torinu, tandu allenau de un’omini famau: Nereo Rocco. De sa citadi sabauda, aunia giogat in dus annus undixi partidas, torrat in Veneto, po difendiri sa janna de su Lanerossi Vicenza. S’annu in fatu, in su 1966, lompit a Casteddu. Inderetura in sa capitali sarda fait una cosa manna: po seti partidas de sighi, de sa de unu a se de otu, non pigat mancu unu gol. Est unu “record” chi galu nemus at batiu. Reginato abarrat su portieri chi giogat dogna partida finas a candu lompit de sa Fiorentina Erricu Albertosi, tandu giai famau e giogadori de sa natzionali italiana. Ma Reginato non s’arrendit a abarrai setziu e fait sciri a su presidenti casteddaiu ca at a fairi de totu po giogai.

Ponit totu s’impignu in is allenamentus ma Scopigno at giai decidiu: Albertosi in campu e Reginato setziu. At essi aici po cinc’annus, ma cun Albertosi si pesat, su matessi una amistade manna. Cumprendit inderetura ca a si dda giogia cun Albertosi no est possibili: “Deu candu faddia non dromia su noti, at a contai, Ricky non ci pensaiat e torraia a partiri comenti chi non fut sussediu nudda. Teniat personalidadi forti e manna cunfrontis a mei”. P

Pagu de fairi po Adrianu, ma est su matessi Albertosi a ddi fairi un’arregalu mannu fendudeddu giogai in sa partida cun su Bari de su 12 de arbili de su 1970: “Albertosi m’at tzerriau in campu po podiri nai una dì ca deu puru fui in campu candu su Casteddu at bintu su scudetu. Cun Albertosi fustis che fradis e ddu apu scioberau, comenti de pardinu, po batiai a figlia mia Elisabetta”.

“Is arregodus non tenint tempus – at nau in is annus Reginato. S’arregodu prus bellu est cussu de sa dì de su scudetu. A biri s’allirghia in is ogus de is tifosus e de is cumpangius mius est cosa chi non pagat dinari”.

Abarrat in Casteddu finas a su 1973, ma s’urtima partida dda giogat in su mesi de Sant’Andria de su 1971. Serrati s contus cun su Casteddu gioghendu po cincuantanoi bortas in totu e pighendu feti cincuantunu bocias de sa janna. Ma est cussu “record” a non ddu fairi morri mai…

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

Foto: https://it.wikipedia.org/wiki/Adriano_Reginato