Est lompiu finas Eldor Shomurodov in Saint-Vincent, in sa Valle D’Aosta, aunia su Casteddu est allenendusì po preparai a su meglius su campionau chi at cumentzai su mesi ch’intrat. Shomurodov est figliu de Azamat e nebodi de Ilkhom chi a borta insoru funt stetius dus giogadoris de fubalu. Su fradi invecias at scioberau de abarrai a foras de su sport e at intregau sa vida sua a is studius de limba e literadura russa. Shomurodov est un’atacanti bravu meda a fairi gol e finas a ddus fairi fairi e podit giogai in dogna parti de su campu, ma sempiri in atacu. Est lestru meda e forti de corpus e finas de conca si difendit. Trabagliat meda po s’orrestu de sa scuadra torrendu a coa a si pigai sa bocia. Ddu ant annomingiau su “Messi Uzbeko”, finas chi est prus artu de binti centimetrus de su “Puligi argentinu”. Tenit bintot’annus e ddu at bofiu cun fortza s’allenadori Ranieri po tenni un’atacu prus forti. Atacu chi po immoi tenit finas Lapadula, Pavoletti e Mancosu.
De eriseru a merì s’agatat cun s’orrestu de is cumpangius. Lompit de sa Roma e cicat riscatu a pustis ses mesis de artus e bascius cun sa magligedda de su Spetzia. Dificili meda at essi a ddu biri in campu in sa partida, intru de amigus, de su Casteddu contras sa scuadra de is giovunus de sa Roma.
Non ddu ant essi nemancu de seguru Nandez, Mancosu, Lapadula, Capradossi e Desogus, chi funt allenendusì po contu insoru. E nemancu Jankto chi est in su JMedical de Torinu po si fairi controllai a pustis airi intendiu calencunu doloreddu in sa coscia intru de mesu de sa partida de sa cida passada cun su Terranoa.
Fidi meda tenit s’allenadori Ranieri in sa truma noa, ca bit sa gana chi ci funt ponendu is piciocus. In su fratempus sa sociedadi est allirga meda po comenti est andendu sa partida de is abonamentus. C’at gana de Serie A, dappoi un’annu de suferentzia in B. Parit ca dognunu est fendu su doveri su. Ma at essi su campu a nai sa beridadi.
Màuru Mura
Mercuris su bintises de triulas de su 2023
Foto: https://it.wikipedia.org/wiki/Eldor_Shomurodov
