S’aministradori delegau beciu de Autostradas po s’Italia (Aspi), Giuanni Castelluci est stetiu cundennau a dogi annus de presoni po s’orruta de su Ponti Morandi, in Genova, de su 14 de austu de su 2018. Po su manager is curpas de s’orruta de su ponti e de is mortis sussedias.
Custa est sa sententzia, de primu gradu, chi is giuigis de su Tribunali de Genova ant decidiu. Sa cundenna lompit a pustis de otu annus de tempus de sa tragedia de su 14 de austu, aunia funt mortas corantatres personis. Po Castellucci, chi at cumandau s’Aspi de su 2005 a su 2019, sa procura iat pedi 18 annus e ses mesis de presoni. Su matessi Castellucci est paghendu giai una cundenna po s’orruta de su ponti de Monteforte Irpino in sa provincia de Avellinu, sussediu in su 2013.
Cundennaus finas atrus chi trabbagliaiant po s’Aspi, po sa Spea e po su Ministeriu de is Infrastruturas. E aici Migheli Donferri (chi de s’Aspi fut su numuru tres) at buscau undigi annus de presoni, candu su Pubricu Ministeru nd’iat pediu cuindigi e ses mesis. Cundenna a cinc’annus e ses mesis po Paulu Berti (numuru dus beciu de s’Aspi), candu su Pm nd’iat pediu dogi e ses mesis. Matessi cundenna po Antoninu Galatà (aministradori delegau beciu de Spea) po su cali su Pm iat pediu seti annus.
Màuru Coletta, chi trabbagliaiat comenti de diretori po donai crobba a is cuncessionis autostradalis de su Ministeru de is Infrastruturas, at tentu una cundenna de cincu annus de presoni.
S’est cicau cussu chi teniat curpa, ma non sa curpa. Difatis, Castellucci at pigau sa cundenna chena tenni curpa. Sa curpa sua est de essiri innocenti”, at nau s’bogau chi difendit su aministradori beciu de Aspi, a pustis sa sententzia. “Eus a sighiri a cumbatiri in tribunali po s’innocentzia sua e seus segurus chi is giuigis nos ant a donai arregioni”, at sighiu.
Foto: https://www.corriere.it/cronache/26_luglio_16/ponte-morandi-crollo-2018-sentenza-dc442f4a-e083-487a-835b-c3bbcc262xlk.shtml
