Est mortu in sa dì chi sa “Corte Costituzionale” at decidiu de non donai su permissu po su referendum in pissu de scioberai de ponni s’acabu a sa vida. Amedeu Grisi teniat corantanoi annus e faiat su cantanti e fut gherrendu cun sa “Sclerosi laterale amiotrofica” de set’annus.

Est durau ses mesis de candu, in s’istadi passada, iat decidiu a sa sola de frimai sa manera de si curai. Iat nau, craru e tundu, ca preferiat a si morri che a biviri, mancu sciat po cantu, cun calencuna cosa in is gangas o in su stogumu. Nemus podit nai a fatu mali o fatu beni, dognunu de sa propria vida iat depiri fairi, massimamenti candu sa suferentzia est tropu manna, cussu chi bolit.

Amedeu iat cicau de fairi cumprendiri cussu chi pensaiat in is social: “Nosu malaidus de Sla teneus sa fortuna manna de decidiri chi biviri ancora e duncas andai a innantis. Nosi stampant is gangas, nosi ponint unu canneddu po sulai e atrus canneddus prus piticus in su stogumu po papai. Totu custu abarrendu frimus in su letu, chena si moviri e aspetendu sa morti chi erribat, cuasi sempiri, in su temepus de dus annus. S’atra possibilidadi chi nosi donant est cussa de non si fairi stampai is gangas. Deu apu scioberau sa de duas poita se de unu non dda intendu mia e poita su disigliu  miu est cussu de torrai a essiri liberu”.

“No apu scioberau sa dì e su mesi po mi morri. Ma candu at a erribai sa dì aunia non possu sulai mi frimu. Su tempus mius– iat aciuntu –  est acabau. Unu mesi, dus o una cida? Deu soi prontu, ca soi seguru ca po calencunu non m’apa a morriri mai de averas. S’amori e sa musica nosi fait biviri sempiri”.

In su mesi de gennargiu de cuatr’annus a imoi, in cussu chi fut stetiu s’oratoriu de Santa Brigida, in Sanremo, Grisi fut arrennesciu a cantai paris a Claudiu Baglioni, chi tandu presentaiat su festival. In su mesi de Sant’Andria de su matessi annu iat nau: “Soi gherrendu cun sa bogi mia. de unu mesi tengiu problemas mannus, non sulu prus beni e non ce dda facu a cantai. De dus annus apu acabau de sonai sa chitarra, chi de sempiri m’at fatu cumpangia”. Adiosu Amedeu, chi sa terra ti siat lebia.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.today.it/cronaca/amedeo-grisi-morto-cantante-chi-era.html