Intendiu de Klaus Davi, in sa trasmissioni sua “Klauscondicio” Paulu Truzzu, su sindigu de Casteddu e candidau a presidenti de sa Regioni cun sa coalitzioni de centrudrestra, a una pregunta in pissu de Mighela Murgia at arrespustu ca: “Deu non dd’ia intregai mai un’orruga o unu monumentu, poita mi parit una prus negativa che positiva, comenti mi pariat una chi boliat imparai a is atrus eita depiant pensai e a ddi ponni in conca is pensadas suas. Po mei fut una totalitaria”.
A pustis calencuna ora de is fueddus de Truzzu, funt lompius cussus de Alisandra Todde, candidada de su Campu mannu: “Soi chena fueddus a pustis cussus chi apu intendiu de su sindigu de Casteddu po cantu pertocat Michela Murgia”, narat sa Todde. “Custus fueddus non feti mancant de sensibilidadi po una femina chi at agiudau meda sa chistioni culturali e sociali de sa Sardigna, ma faint finas cumprendiri sa gana de ponni a un’ala is bogis chi si ndi pesant po promoviri is pensadas e su mudamentu”.
A pustis airi postu in pumus artus sa Murgia, Alisandra Todde at chistionau de Truzzu: “Ddu cumbidu a torrai a pensai in fueddus chi at umperau e a cumprendiri in pissu de s’importu de su fueddai a paris”.
A pustis, finas Soru, s’atru candidau a guvernadori, at fatu intendiri sa bogi sua. Ma non po cantu pertocat sa Murgia, ma po atrus fueddus de Truzzu, chi candu dd’ant pregontau chi fut contras de su fascismu at arrespustu ca issu fait politiga po sa genti e non contras a calencuna pensada, e ponendu in contu ca a nemus ddi pregontant chi funt contras de su comunismu. “Dispragit ca su sindigu de Casteddu non nerit de essiri contras de su fascismu e ca non abbisongiat a essiri contras ma a favori”, narat Arrenatu Soru. “E pongiat in sa matessi arregioni, innoi in Italia, s’esperientzia de is fascistas cun is comunistas. Si depit arregodai ca su comunismu no at betiu guerras e no at mandau is italianus in is campus de trabagliu e de morti, no at fatui s leis ratzialis. Totu custu ddu ant fatu is fascistas”.
Màuru Mura
Giobia, su cuindigi de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://algherolive.it/2024/02/07/elezioni-in-sardegna-primi-sondaggi-truzzu-a-46-la-todde-al-419-se-si-votasse-oggi-primo-partito-fdi-e-secondo-m5s/
