Polemica manna, a pustis is festas po arregodai sa vitoria de sa Republica contras de sa monarchia de su dus de làmpadas de su 1946. Sa polemica est nascia de parti de sa Lega po is fueddus de su presidenti Sergiu Mattarella, ca in sa chistionada cun is giornalis e is televisionis at nau, intru de atras cosas medas, chi “cun su pesamentu de su Parlamentu europeu benienti si nd’at a pesai sa sovranidadi de s’Unioni Europea”.
“Chi pensat de averas ca sa sovranidadi est de s’Unioni Europea e non de s’Italia, po coerentzia si depit fairi de parti”, sa pensada strollica a is fueddus de su Presidenti de su leghista Claudiu Borgi.
E, apustis, at pigau fueddu finas su segretariu de sa Lega, Mateu Salvini: “Oi est sa festa de is italianus, de sa Republica, non de sa sovranidadi europea. Teneus unu presidenti de sa Republica poita c’est sa Republica. Deu pensu a s’Europa comenti de stadus sovranus chi si ponint paris, ma sa sovranidadi natzionali est sa cosa de prus importu. A parti is ‘tweet’, oi si festat sa Republica italiana. Non m’apa mai arrendiri a unu Stadu europeu aunia cumandant cussus chi tenint prus dirani”, is fueddus de su capu de is leghistas e finas ministru de su guvernu de Giorgia Meloni.
Comenti de in donnia is opositzionis ant fatu intendiri sa bogi insoru: “Is fueddus de sa Lega andant contras de su presidenti Mattarella. Mai si fut bida una polemica aici in sa d’ de sa festa de sa Republica”, at inderetura nau sa segretaria de su Partidu Democratigu Elli Schlein.
A intru de is Steddaus Giusepu Conte chistionat de is fueddus de sa Lega comenti de “foras de conca e chi non si podit intendiri” e finas Alleanza Verdi Sinistra, Renzi e Calenda ant chistionau su matessi “de fueddus macus” de parti de sa Lega.
Finas Tajani, chi de sa Lega est amigu de guvernu, at nau sa sua chena girus de fueddus ma in manera crara: “Seus italianus e europeus, custa est s’identidadi nostra. Custa est es aciviltadi nostra. Dogna scioberu chi andat contras de s’Europa est negativa po s’Italia”.
Màuru Mura
Lunis, su tres de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.today.it/politica/mattarella-dimissioni-lega.html
