De su Cumunu de Budapest, chi at aprontau sa manifestada de su “Pride” mancai chi po lei de su guvernu Orban fut vietau, fueddant de sonumancu centubinti mila personis chi ant prenu sa capitali ungheresa. “Unu sucessu mannu”, narat chini at aprontau. In conca de su corteu su sindigu de sa citadi, Gergely Karacsony, a su cali ant batiu meda is manus. E finas sa delegatzioni de deputaus de su centrumanca europeu si ddue agataiat. Elly Schlein, paris a atra genti meda, at cantau “Belal Ciao” e si ddue funt ligius prus de unu cartellu contras de sa presidenti de sa comissioni Ue, Ursula Von der Leyen: “Ursula, ses cun Orban o sa democratzia”, unu de is medas chi si ddue ligianta. Medar finas is magligeddas contras de Orban o po is deretus de sa comunidadi Lgbti+.
“Unu schifu e una bregungia”, cun custus fueddus su presidenti ungheresu Viktor Orban at chistionau de su Pride apronatau s’atra dì in Budapest, incurpendu l’Unioni Europea de airi incarrigau is politicus de s’opositzioni de aprontai sa manifestada, chi s’est mudada in dd’unu morrungiu contras de su guvernu. Ddu narat s’agentzia “Reuters”, in su giassu cosa sua, chistionendu finas de is giornalis ungheresus.
“De oi seus ancora prus cunvintus ca custa genti non depat lassada a s’acostiai a su cumandu de su guvernu. Non ddu eus a permitiri”. Orban, dapoi at criticau is “spetaculus de ‘drag queen’ in pissu de palu e is ominis cun is crapitas a tacus artus e is paperis chi chistionant de ‘terapia ormonali’.
“Eris eus imparau calencuna cosa in prus”, at sighiu a nai su presidenti Orban, po cussu chi narant is giornalis ungheresus. “Bruxelles at donau cumandu po fairi su ‘Pride’ in Budapest. Is politicus pagliacius insoru ant nau ca giai. Custa est sa prova de comenti iant andai is vidas nostas chi sa Natzioni non fut ghiada de unu guvernu natzionali chi bigliat sa sovranidadi de su Stadu”.
Màuru Mura
Lunis, su trinta de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.virgilio.it/notizie/pride-a-budapest-viktor-orban-passa-all-attacco-ripugnante-e-vergognoso-ordinato-dall-unione-europea-1687632
