“Custu mengianu apu lamau a Alisandra Todde, dd’apu fatui s augurius e dd’apu nau ca nosi eus a biri in Consigliu Regionali, aunia ap’a fairi is interessus de sa Sardigna e de is sardus. Seus a suta de calencuna migliaia de votus de is 750mila chi ant votaus. Eus perdiu de pagu. Mi dispragit, sa spera fut cussa de atrus numurus. Sa responsabilidadi, chi tocat a dda donai a calencunu, est feti sa mia”.
Aici chistionat Paulu Truzzu, a pustis sa partida perdia cun Alisandra Todde. Cun signorilidadi at fatui s cumplimentus a sa presidenti noa de sa Sardigna.
In prus, Truzzu, at fatu sciri ca lassat sa cadira de sindigu de Casteddu po si setziri in Consigliu Regionali.
Po cussu chi pensat, totu s’est decidiu in Casteddu, aunia sa genti dd’at scrocorigau: “In Casteddu funt medas is votus contras de mei e no a favori de sa Todde. Ma chi mi pregontais chi iat a torrai a fairi totu s’arrespusta mia est ca eja”.
Batosta po sa Meloni? Nou, Truzzu difendit sa presidenti de su Consigliu: “Cun tres o cuatru puntus in percentuali in prus in Casteddu iaus bintu nosu e oi fustis fueddendu de sa vitoria de sa Meloni, po custu nau ca sa responsabilidadi est feti sa mia”.
“Non ce dd’apu fata a fairi cumprendiri – sighit fueddendu sempiri de Casteddu – ca is cantieris de sa citadi si funt fendu po su beni de sa citadi. Cussu chi s’est fendu s’at a cumprendiri prus a innantis. Scia ca non pragia a totus, ma non pensiaia aici meda. Ca, dapoi, finas is candidaus chi fueddaiant cun sa genti mi poniant in seguresa”.
Si pigat is curpas ma si ndi tirat una perdigedda de is crapitas candu chistionat de is alleaus: “Forsis, cumentzendu a innantis sa campagna eletorali, si podiat binciri. At pesau su scioberu aici adduru de su candidau a presidenti, ma soi cuntentu de is numurus chi apu tentu in is biddas. Apu perdiu in is citadis, passientzia”:
Màuru Mura
Martis, su bintiseti de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilgiornaleditalia.it/news/politica/582570/elezioni-regionali-sardegna-exit-poll-truzzu-todde-soru.html
