Una ciaciarrada, in su telefunu, addurada cuasi un’ora, eris, intru de su presidenti de sa Russia, Vladimir Putin, cun cussu de is Stadus Unidus, est a nai Donald Trump.
In su centru de sa ciaciarrada sa cica de una solutzioni, coidendu, po sa guerra intru de Ucraina e Russia chi addurat de prus de tres annus. Su presidenti russu at nau a-i cussu de is Stadus Unidus ca bolit cicai una solutzioni negotziada a sa guerra e ca Mosca “no at a ponni a un’la is sfortzus chi at fatu po ndi bogai is arregionis fundudas” de sa guerra, at nau su consiglieri presidentziali Yuri Ushakov.
Sa Russia “no at a rinunciai a is obietivus chi si poderat”, in Ucraina, finas chi su Cremlinu est a dispositzioni po sighiri sa diplomatzia cun Kiev, sa capitali de s’Ucraina, iat airi nau Vladimir Putin. “Su presidenti nostru, Putin, at finas nau ca sa Russia at a sighiri is obietivus, est a nai su bogamentu de is arregionis connotas de totu, chi ant portau Russia e Ucraina a si fairi sa guerra”, at nau su matessi Yuri Ushakov.
Po Mosca, is cunditzionis po sa pagi in Ucraina, funt su donamentu de cuatru regionis chi funt in parti ocupadas, in prus de sa Crimea, pigada in su 2014, e sa rinuncia a imbucai in sa Nato.
Is dus presidentis ant finas fueddau, intru de issus, de sa situatzioni chi pertocat s’Iran e ant decidiu de sighiri is cuntatus in pissu de custa chistioni, cun Putin chi at nau de cicai una solutzioni “politica e diplomatica”. Non s’est, invecias, fueddau de su poita is Stadus Unidus ant frimau su donamentu de armas a Kiev, “a sa chistioni non si ddu seus acostiaus”.
Su presidenti de sa Russia, cun cussu de is Stadus Unidus, est sa bia de cincu chi s’intendint po telefunu, de candu Donald Trump est torrau a ghiai sa Natzioni de su mesi de gennargiu passau e ant sempiri ciau una solutzioni po sa pagi in Ucraina.
Màuru Mura
Mercuris, su dus de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.ansa.it/sito/notizie/mondo/2025/07/04/trump-nessun-progresso-sullucraina-con-putin-continuiamo-a-dare-armi-a-kiev_58e0ace7-4ed3-42f7-8da0-1adcc7e2c36f.html
