Donald Trump at annuntziau ca po sa borta de tres s’at a torrai a candida comenti presidenti de is Stadus Unidus. Ddu at fatu cun d’una ciaciarrada de un’ora in televisioni.
“Sa torrada de s’America cumentzat oi”, at nau a innantis de totu, e chistionendu de totu is spantus de s’aministratzioni cosa sua. At sighiu incurpendu Joe Biden de airi porta s’America a unu Contindenti sempiri prus postu mali: de airi fatu torrai is sordaus de s’Afghanistan a sa gherra in Ucraina chi amostat comenti su mundu “est is s’oru de una guerra nucleari”.
“Propriu oi unu missili est stetiu fatu orruiri, cun probabilidadis medas, aintru de is làcanas de sa Polonia. Sa genti est ammachiada e inchieta e nosu teneus unu presidenti chi si dromit in is atobius internatzionalis”, at nau cun feli. S’arrespusta de Biden est lompia inderetura de su G20 de Bali cun d’unu tweet: “Donald Trump at orrovinau s’America”.
“Po tenni s’America un’atra borta manna e gloriosa, custu merì bosi nau ca mi candidu a sa presidentzia de is Stadus Unidus. Biden non at andai ancora cuatr’annus a innantis”, at impromintiu Trump, assegurendu chi “de immoi a “s’election day” apa cumbatiri comenti mai nemus at fatu a innantis e eus a biciri contras sa manca democratiga chi est cichendu de sciopai su Stadu nostu de a intru. Custa no at essi sa campagna eletorali de Donald Trump, ma depit essiri sa Campagna eletorali de bosatrus”.
Trump – chi at torrau a chistionai de su movimentu Maga (Make America Great Again), su diciu sou “American first” e at donau sa spera de un’atra idadi de s’oru – at chistionau de totu is cosas fatas candu fut presidenti, chena perou mai cicai is umbras acapiadas a issu e totu: su sciasciu de sa pesta e sa “faula manna” in pissu de is eletzionis acabbada cun s’imbucada de is “tifosus” sus in su Cungressu, tra totus.
Màuru Mura
Giobia, su 17 de Sant’Andria de su 2022
Foto: https://edition.cnn.com/2022/11/15/politics/donald-trump-investigations-lawsuits/index.html
