Dde fatu sa vitoria de is eletzionis e una dì de pasu, Giorgia Meloni, cumentzat inderetura a trabagliai po fairi sa scuadra chi at a guvernai is cinc’annus benidoris. Una dì de atobius e telefonadas e a pusti prangiu una ciaciarrada cun Antoni Tajani.

Sa prima cosa chi si depit pensai po oberri sa legisladura est cussa de is presidentis de sa Camera e de su Senau. Is pensada funt medas, ma totu acapiadas fintzas a is nominis de is ministrus. Po sa Camera is nominis chi si cicant de prus funt cussus de Tajani e Giorgetti e po su Senau, invecias, cussu de Ignatziu La Russa.

Po cussu chi pertocat sa scuadra de su guvernu, cun Giorgia Meloni presidenti, issa e totu tenit s’idea de ponni dus “vicepremier”: Tajani e Salvini. Totu custu po non fairi certai a nemus. Sa Meloni giai nd’at chistionau cun su coordinadori de Fortza Italia e coitendu ddu at a fairi cun su leghista, eriseru impignau in su consigliu federali de sa Lega, chi bolit po issu unu ruolu de importu mannu in su guvernu.

Cussu chi a totus parit seguru est ca Giorgia Meloni non bolit donai su Ministeru de is internus a Salvini, chi est cussu chi su leghista bolit comenti at nau in dogna palcu.

“Sa cosa chi bolit e s’aspetat sa natzioni est chi siant scioberadas is personis prus balentis, genti chi lompit in is uficius a is otu de mengianu e ndi bessat a is seti de merì e chi connosciant beni su de fairi”, at postu in craru Guidu Crosetto, chi est cuasi seguru intru de is ministrus benidoris aici comenti un’atru sempiri paris a sa Meloni: Franciscu Lollobrigida. Nominis si ndi faint medas, ma a bortas non bessint a campu, poita benint fatu foras de is amigus e totu. Immoi tocat a biri chi non cumentzint a certai po su poderi, ca de annus medas ddu faint. A is impromissas depint sighiri is fatus. Ce dd’ant a fairi?

 

 

Màuru Mura

 

 

Mercuris, su 28 de cabidanni de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.repubblica.it/politica/2022/09/26/news/giorgia_meloni_primo_giorno_dopo_elezioni-367471932/