Fut de diora chi non si faiat intendiri, ma forsis, po is sciollorius chi narat dogna borta chi oberit buca, podiat abarrai mudu ancora po unu pagu de tempus. Nemus intendiat sa mancantzia de Donald Trump, omini chi aboginat sempiri e chi arregodat un’atru omini chi bivit in Italia, cussu puru sempiri in cica de votus.

Bieus de aunia at cumentzau Trump. Fueddus de feli contras Biden : “Est unu prantu, at umiliau s’America in su mundu. E imoi Vladimir Putin giogat cun is Stadus Unidus”.

Custus is fueddus de Trump chi at decidiu de si torrai a presentai po fairi su presidenti un’atra borta de su 2024. Custu progetu, po imoi feti in sa conca sua, ddu at fatu sciri de Florence, in Arizona, unu de is logus aunia, sempiri po sei, is democratigus ant cogliunau de prus cun su votu.

In su cumitziu tentu indenanti de genti meda, Trump, arregodaus ca est unu de is ominis prus erricus de s’America, at sighiu a chistionai mali de su preisdenti in carriga e de is democratigus totus: “Est genti chi non tenit capassidadis e non cumprendit nudda. Invecias de nosi torrai a fairi biviri, nosi bolit assustrai cun s’obrigu de su vacinu, in su mentris Big Pharma s’erricat ancora de prus”, at sighiu a nai fueddendu de sa pesta de su Covid.

Sciendu ca a sa genti no vax non pragit Anthony Fauci, at duncas chistionau de cussu e a is fueddus de Trump nd’at fatu artziai is bogis de chini ddu fut ascurtendu. “Lock Him up”, chi bolit nai a ddu acapiai, aboginaiant a bogi forti.

Non podiat mancia un’acinnu de candu is “tifosus” sus funt imbucaus in su Campidoglio de Washington: “Sa beridadi manna est ca sa rebellia non fut cussa ma est stetia su tres de Sant’Andria, candu eus votau, nosi ant cogliunau. No est acabada aici poita in su 2024 nosi torrau a pigai sa “Casa Bianca”, e a innantis su Cungressu”.

Narat su diciu: a fueddus macus, origas surdas!

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.rainews.it/articoli/2022/01/il-ritorno-di-trump-nel-2024-elezioni-storiche-5b0b612b-71b9-4820-b111-8d8e392fbce5.html