De lunis passau, a pusti prangiu, si podit comporai s’abbonamentu po castiai totu is partidas de su Casteddu. E, is numurus, allirgant meda su presidenti Giulini ca, po immoi, funt giai tremila e cincuxentus is tesseras comporadas. E giai de lunis s’est amostau unu numuru mannu e spantosu, ca in milli e cincuxentus si funt presentaus a comporai s’abbonamentu. S’obietivu de su Casteddu est cussu de giumpai su numuru de ocannu passau, candu funt stetius bendiu 13.500 abonamentus. Finas a dominigu si podit comporai s’abboanmentu po su matessi logu, in su stadiu, tentu ocannu passau e cusu si podit fairi geti “Online” in Ticketome, in su mentris ca de dominigu finas a su ses de su mesi ch’intrat ant essi umperaus is logus aunia si comporant sempiri is biglietus.
Po is rinnovus su pretziu est cussu de 270 eurus po sa Curva Nord e Sud, 500 eurus po is “Distinti” de pissu e de artu, 600 eurus po is “Distinti” centralis, 1.000 in Tribuna asula e 1.400 in sa Tribuna orrubia. Su pretziu est prus basciu po is feminas, po is piciocus a suta de is dixiot’annus, po ominis e feminas cun prus de sessantaxinc’annus e ancora prus basciu po is pipius a suta de is dox’annus. Is abbonamentus nous, invecias, funt unu pagheddu prus artus: s’andat de is 300 eurus po is curvas, finas a is 1.500 po sa Tribuna orrubia.
In su mentris, su presidenti de su Casteddu, Tomasu Giulini, saludat a Tomasu Augello e Nicolas Viola chi de ocannu chi benit no ant a preniri sa filera de is giogadoris de sa scuadra. De Augello, massimamenti, spantat su sceberu chi, parit, apat fatu: est a nai ca, a pustis airi giogau totu is partidas in Serie A (unu de is meglius comenti de laterali de manca, ddu narant is numurus), at a lompiri in Palermo, aunia at agatai a Filipu Inzaghi comenti de allenadori. Paris ant a cicai de portai is sicilianus in Serie A.
Màuru Mura
Cenarba, su bintiseti de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=wt8ntMvX898
