Pàulu Truzzu narat ca nou. Su sindigu de Casteddu non si ponit paris a is atrus milli sindigus italianus chi iant biri ancora Màriu Draghi comenti de presidenti de su Guvernu Italianu.
Pigat su caminu de su partidu, cussu de Giorgia Meloni: “Umperant is istitutzionis chena bregungia”, at nau la “leader” de Fradis de s’Italia.
“Non mi pragit e non fait po mei custa nova”, is fueddus de Truzzu, “parit ca a suta ddue siant is istitutzionis, ma chi si castiat beni est una proposta chi benit de is sindigus chi sustenint is partidus de guvernu” e duncas “amostat una precisa volontadi politiga de parti”.
“A biri e a dda nai beni – sighit a nai su sindigu de Casteddu –, a lassai sighiri trabagliai custu guvernu est unu ‘accanimento terapeutico’, po tenni in vida unu guvernu frimu in totu de divisionis a intru de cussu e totu chi fait mali a totu s’Italia e is matessi comunidadis localis. Is sindigus, e ddu possu nai cun grandu seguresa, tenint abbisongiu de cosas seguras e de unu guvernu chi siat capassu de agiudai su trabagliu chi non tenit paragoni cun perun’atru. Trabagliu chi, est a nai, est dogna dì peus”.
Duncas una proposta sbagliada e “contras natura”. “Sa credibilidadi e sa legitimatzioni de is sindigus nascit propriu de su cunsensu de dognunu de issus chi ant scipiu pigai. Po nosu est s’ora giusta chi finas a livellu natzionali s’Italia possat tenniri unu guvernu forti e stimau de cussu chi narat sa genti”.
Dognunu, chena si podiri sbagliai, podit nai sa sua: ma chi sa proposta de is sindigus chi s’amostant a su costau de Draghi est de parti, cussa puru de su sindigu casteddaiu no est sa matessi cosa? Cussu puru est de sa parti de su partidu chi ddu at fatu diventai sindigu. Duncas a s’acabbu totu torrat e dognunu tirat s’abba a sa mola sua.
Mercuris nd’eus a sciri de prus.
18 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://mobile.twitter.com/truzzu
