Dus incidentis cun mortus e unu invecias cun ferius legius in pag’ora in is caminus sardus. No spantat ca dogna istadi est aici, prus machinas e motos in giru, stradas chi faint erriri, lestresa in sa guida e a chini tocat tocat.
Pigai sa machina o si fairi unu giru in sa motocicreta est sempiri prus perigulosu, forsis una de is urgentzias prus mannnas po is sardus est de averas sa situatzioni de is cantieris chi parit no acabint mai.
Si tzerriaiat Andria Pissenti Secci s’omini de trintacinc’annus mortu eris in sa strada chi de Ballao portat a Santu Idu. Originis sardaas, cun residentzia in Germania, forsis fut andendu a Porto Corallo po pigai possessu de una domu aunina fairi is ferias in Sardigna. A sa bessida de una galleria, in sa strada statali 387, calencuna cosa est andada mali cun sa sua Nissan Qashqai, cun targa tedesca, abarrada cun su guardrail aintru. Su corpus est stetiu arreconnotu pagu tempus de fatu de unu parenti.
In Orgosolo, calencuna ora a innantis, Carrulu Moro, un’operaiu de s’Anas de cincuantatres annus est mortu andendu a isbatiri contras unu muru in su fratempus chi fut in Corso Repubblica in Orgosolo etotu.
Bia is duas de mengianu, in su noti intru sabudu e dominigu, fut torrendu a domu candu a s’artaria de sa potecheria at cumentzau a andai de una parti a un’atra, perdendu su cascu e andendu a isbatiri contras de domu sua, chi s’agatat indenanti de cussa de sa mama. Non c’est stetiu nudda de fairi e s’indagu est imoi a biri chi at tentu mali.
Violentu meda in Tertenia, in sa strada chi portat a su mari de Sarrala, s’addobbada faci a faci intru de un’Iveco Daily e una Renault Clio. Tres is personis abarrradas ferias. S’omini, chi guidaiait s’Iveco, ddu ant portau inderetura a s’Uspidali Nostra Segnora de sa Mercede de Lanusei. In sa Clio, invecias, s’agataiant dus strangius tedescus chi, torrendu gratzias a is Vigilis de su Fogu, ddus ant portaus in Casteddu.
20 de làmpadas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.mit.gov.it/comunicazione/news/incidenti-stradali-online-il-rapporto-sulle-statistiche-2018
