Cun su paregiu de su Perugia contras de cussa chi fut sa scuadra a innantis de totus, est a nai s’Aretzo, giumpau de su Ravenna chi at bintu cun sa Torres, immoi is sassaresus tenint a is palas feti su Rimini. A nai sa beridadi, po cussu chi narat su campu, sa scuadra de su presidenti Stevini Udassi est cussa chi at fatu prus pagus puntus de totus, poita is romagnolus funt partius cun doxi puntus a suta de su zeru. Po sa Torres, a pustis trexi partidas, funt giai otu cussas perdias e feti una binta cun atras cuatru paregiadas. Po immoi unu disispseru.
Est po totu custu ca is sassaresus ant decidiu de torrai a lamai s’allenadori Arfonsu Greco, chi fut galu pagau. Totu at essi amostau cras in dd’unu atobiu cun is giornalistas, aunia ddu ant essi su presidenti Udassi e su diretori sportivu Andria Colombino.
Sa Torres preferit duncas andai in su seguru, e a non ci fuliai atru dinari, torrendu a lamai un’allenadori chi connoscit beni, finas poita a pustis s’allenadori Migheli Pazienza, finas su progetu de fairi giogai is giovunus benit post ua un’ala indenanti a una situatzioni de clasifica chi peus est dificili a agatai. Est a nai ca s’erriscat de bessiri de su professionismu chi non si donant una movida. Sa Torres non bincit de doxi partidas e non fait unu gol de seti. Tocat a torrai a curriri.
S’allenadori Greco at a podiri ghiai una truma cuasi oguali, ma a dolumannu prus pobera in tecnica e in personalidadi, a cussas chi funt lompias segunda e tertza in is campionaus passau.
Immoi, po brulla de su distinu, is partidas benientis s’ant a giogai cun scuadras in sa matessi situatzioni de is torresinus: su Perugia in domu e su Livorno cun su Rimini a foras. Tres partidas de importu mannu po su sighimentu de su campionau.
Màuru Mura
