Atra vitoria po s’Itlia de su Tennis: is giogadoris asulus bincint sa Coppa Davis po s tertza borta, totu paris, de sighiu e imbuncant in sa storia.
In sa finali de Bologna, binta po 3-0 contras de sa Spagna gratzias a Mateu Berrettini contras di Carreno Busta (6-3, 6-4) e de Flaviu Cobolli chi bincit po 2-1 contras de Jaume Munar (1-6, 7-6, 7-5).
S’allirghia de su Presidenti Binaghi, chi a innantis de giogai iat sonau sa carriga: “Binceus po donai fortza a Pietrangeli”. E chi inderetura a pustis airi bintu at nau: “Teniat arregioni Sinner. Iat nau ca non c’iat abbisongiu de issu poita teniaus una scuadra forti meda. Et est sussediu”.
Est sa bia de cuatru chi s’Itlia bincit sa Coppa Davis in su tempus, a corantanoi annus de sa vitoria de unu, in Cile in su 1976. Chena su marzianu Jannik, sa generatzioni noa at agatau in Mateu Berrettini e Flaviu Cobolli is giogadoris mannus chi ant donau allirghia a chini s’est amostau in s’Arena de Bologna.
Est una letzioni de amparu po chini naraiat ca chena Sinner e s’atru giogadori prus forti, est a nau Larentu Musetti, si podit binciri su matessi.
In Bologna, a dogna manera, sa natzionali de Filipu Volandri no at cediu mancu unu giogu a is aversarius: cun Austria, Belgio e infinis cun is spagnolus non s’est depiu giogai in dus po serrai is partidas. Berrettini e Cobolli, pesaus imparendu a giogai in is matessis campus de sa Capitali italiana, ant agatau inderetura s’arregioni cun sa genti lompia a trumas chi ddus at portaus a sa vitoria.
Sa partida de Berrettina est stetia facili de averas in su mentris chi su giovunu Cobolli at depiu sunfriri de prus meda e at tentu abbisongiu de una partida giogada cun fortza e sabidoria. Aici e totu comenti fut sussediu cun su belga Bergs in sa partida a innantis de sa finali. “Est sempri stetiu su bisu miu e immoi ca ddu apu tentu non ddu apu ancora cumprendiu beni”, is fueddus de Cobolli, a pustis airi bintu.
Màuru Mura
