New York tenit unu sindigu nou, su primu musulmanu: est Zohran Mamdani, trintacuatr’annus, candidau democratigu, ma issu si narat socialista. Sa mamma tenit arreiginis de s’India e su babbu, invecias, de s’Uganda, aunia est nasciu Zohran etotu.
Mamdani, a dogna modu, at postu a un’ala is atrus dus candidaus, est a nai su governadori beciu, finas issu democratigu, Andrew Cuomo, chi fut sustenniu de Donald Trump e Elon Musk, e su candidau republicanu Curtis Sliwa.
Est sa stedda noa de su partidu, sustenniu (finas chi ancora non ddu at nau) de Barack Obama, ma non de totu is capus de is democratigus.
At bintu fueddendu de una New York prus a sa portada de totus, cun pullman gratis, supermercaus comunalis, aritus de domu prus bascius e prus impostas a is erricus.
In sa fueddada de unu, a pustis airi bintu custa torrada eletorali, Mamdani at nau ca sa vitoria sua amostat su caminu po “binciri a Trump”.
“Chi calencunu podit amostai a una natzioni traigia de Donald Trump comenti ddu binciri, cussa est sa citadi chi ddu at bidu nasciri”, at nau su sindigu nou. Aciungendu finas: “Trump, bistu ca sciu ca ses castiendu, tengiu cuatru fueddus po tui: artzia sa bogi de sa televisioni”.
Màuru Mura
