Volodymyr Zelensky oi atobiat, in Ankara, su presidenti turcu Recep Tayyp Erdogan e feti tandu at a decidiri cali caminu fairi in sa chistioni de pagi cun sa Russia, at nau unu funtzionariu ucrainu. “Su presidenti at a cumentzai sa bisita sua cun Erdogan in Ankara e feti tandu at amostati su caminu de pigai”, at nau su funtzionariu, a pustis chi is giornalis russu ant fatu sciri ca sa truma de Mosca fut giai lompia in Istanbul, comenti si sciat giai, po fueddai de pagi.
In sa truma russa in Turchia non si ddue agatanta né su presidenti Vladimir Putin e nemancu su ministru de is Strangius Serghei Lavrov. A dda ghiai est Vladimir Medinsky, chi fut su ministru de sa Cultura e oi est consiglieri. “”S’atra dì ddu ia nau, ca non tengiu fidi in Putin”, at nau su ministru de is Strangius italianu Antoni Tajani, candu fut acabbendu s’atobiu de sa Nato in Antalya. “Sa Russai non podit e non bolit coidai poita depit castiai un’esercitu de unu milionis de ominis chi godangiant a duas bortas de cantu godangiat un’operaiu russu e totu s’industria est pensendu a su produsimentu militari e duncas po Putin iant tenni cosa de nai po su chi pertocat su sociali. Ma, custa, est una chistioni de sa Russia, chi at cumentzau sa guerra”.
De Kiev faint, invecias, sciri ca non fut programau unu cumentzu de fueddada intru Zalensky, a is otu. Sempiri in Antalya si ddue agatat su segretariu de Stadu americanu Marcu Rubio chi, a pustis s’atobiu de sa Nato, at nau, in miniscimentu de Donald Trump chi, a dogan manera non s’agatat in Turchia: “Su presidenti de is Stadus Unidus at acrariu insu tempus passau: issu bolit chi sa guerra acabbit et est obertu a calechisiat manera chi porti una pagi giusta e chi addurit in su tempus”.
“Eus a benni a biri eita at a sussediri in is dis benientis, ma nosu boleus andai a innantis, in custu caminu chi eus cumentzau”, at aciuntu Rubio. “Ddu torru a nai: non s’agatat una solutzioni militari a custa guerra, poita at acabbai in manera diplomatica. E a innantis si lompit a un’acordiu e prus pagu genti at a morriri”.
Màuru Mura
Mercuris, su catodixi de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.limesonline.com/rubriche/il-mondo-oggi/i-nuovi-obiettivi-territoriali-della-russia-in-ucraina-e-altre-notizie-interessanti-14714241/
