Su premiu “Sport e diritti umani”, postu in peis de Amnesty International Italia paris a Sport4Societu, lompiu a sa editzioni de ses, est stetiu donau ocannu a Claudiu Ranieri, allenadori de su Casteddu chi a s’acabbu de custu campionau at fatu sciri ca no at mai prus allenai atras scuadras, chi non calencuna Natzionali.
Sa tzirimonia de premiatzioni s’est tenta s’atra dì in Ravenna, intru de s’assemblea generali de trintanoi de Amnesty International Italia, cun sa presentzia de Ricardu Cucchi, presidenti de su premiu, Ricardu Noury, portabogi de Amnesty International Italia, Luca Musumeci, presidenti de Sport4Society e cun sa presentzia finas de Sara Gama, giogadora e dirigenti sportiva italiana, capitana de sa scuadra de is feminas de sa Juventus, chi at donau in manus su premiu a s’allenadori romanu.
Custa s’arregioni de su premiu chi at ligiu su matessi Ricardu Cucchi: “Simbulu de unu fubalu aunia s’etica, is valoris e sa gherra contras de su ratzismu tenint sa matessi valentzia de cussu chi sussedit in campu, Claudiu Ranieri intru de totu sa carriera sua at postu impignu mannu po imparai a is tifosus, a is giogadoris e a totu su mundu de su sport, ca s’arrespetu contat cantu de una vitoria. Una letzioni de arregioni sportiva e de umanidadi”.
“Bosi torru gratzias po custu premiu e po sa batidura de is manus, chi ia depiri fairi deu a bosatrus po su tempus chi intregais dogna dì a custu progetu de prenda – at nau Claudiu Ranieri –. Deu facu feti cussu m’ant imparau in domu de candu fui piticu sa familia mia: arrespetai totus e totas. Gratzias de averas a Amnesty International Italia po m’airi donau custu premiu, finas chi seus nosu chi depeus premiai a bosatrus. Pensu ca su fubalu est de importu mannu po amostai a is giovunus comenti si depit biviri. Serbit massimamenti po is piciocus benientis chi s’incrarant a sa vida. Sa spera manna chi tengiu in su coru est chi si possat lompiri a unu mundu aunia bengiat postu a un’ala su ratzismu”.
Màuru Mura
Sabudu, su primu de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://gianlucadimarzio.com/it/watford-claudio-ranieri-premier-league-4-ottobre-2021
