In is aministrativas de dominigu e lunis passau bincit su centrumanca in tres de is citadis prus mannas, chena depiri fairi torrai tra duas cidas a votai. Bologna, Milano e Napoli ant giai scioberau chena peruna duda: Mateu Lepore in sa citadi emiliana, Beppe Sala in cussa de sa Lombardia e Gaietanu Manfredi in sa citadi de Pulcinella.

In Roma, invecias, is citadinus ant a depiri andai tra duas cidas a scioberai unu intru de Erricu Michetti de su centrudrestra e Robertu Gualtieri de su centrumanca.

Finas in Torino at a tocai a torrai a votai e sa partida est oberta intru de Stevini Lo Russo, de su centrumanca, e Pàulu Damilano de su centrudrestra.

A ddas ligiri aici, e castiendu is arresurtaus de is atras citadis italianas, parit ca custa borta a s’allirgai meda depit essiri su partidu de Erricu Letta (cussu puru at bintu in Siena po intrai comenti deputau). Invecias a si ponni a pensai eita no est andau est massimamenti Mateu Salvini. Sa Lega est su partidu chi prus de totus nd’est bessiu mali meda. In citadis comenti Torinu e Milanu nd’ant boddiu una batosta de non creiri. Forsis a aboginai tropu po cosas de pagu contu non serbit? O forsis a innanti de aboginai tocat a si castiai in domu? A dogna manera Salivini est unu chi non s’atacat e at chistionau inderetura: “Eus lassau tropu pagu tempus po presentai e fairi connosciri is candidaus. Est feti una chistioni de tempus e non de programas. Eus scioberau is meglius, de mei no at erribai unu fueddu contras Bernardo, Michetti, Damilano o Battistini. Eus imparau ca su scioberu tocat a ddu fairi coidendu e totu paris, non cicu peruna giustificatzioni po aunia eus perdiu, ddu eus fatu po curpa nosta, pagu de nai. Cussu chi mi fait feli est ca feti su 50% de is citadinus ant votau: custa est una batosta po totu sa politiga. Is citadinus cun custu nos ant nau ca depeus pensai de prus a is problemas de s’Italia e a non si perdiri, invecias, in tontesas. Deu impromintu ca non mi pongiu prus a arrespundiri a is atacacus de is atrus”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://bologna.repubblica.it/cronaca/2021/10/03/news/bologna_come_si_vota_comunali_2021-320432408/