Sa Francia bincit cun s’Italia in sa partida giogad eris a merì in su stadiu San Siro de Milanu. Is asulus de Spalletti si cualificant a is cuartus de finali de sa Nations League su matessi, ma po mori de custa paritda perdia, ddu faint comenti de segunda in classifica a is palas propriu de is francesus.

Inderetura sa partida s’est posta mali po is giogadoris italianus ca sa Francia, a pustis dus minus de giogu, est passada a innantis torrendu gratzias a unu corpu de conca de Rabiot de unu tiru de su corrunconi. A pustis atra mesoredda, a su minut de trintatres, atru gol de sa Francia e galu de unu tiru de frimu: unu traversoni de Digne ndi boddit sa traversa e, dapoi, andat a sbatiri in sa schina de Vicario (chi at giogau a su postu de Donnaruma ca teniat dolus a s’entiri) e acabbat a intru de sa porta. Passant dus minutus e is italianus s’acostiant a sa scuadra de Deschamps: traversoni de su terzinu de s’Inter Di Marco e Cambiaso cun dd’unu bellu tiru fait su gol de s’1-2. Cun custu risultau is duas scuadras acabbant sa parti de unu. A sa torrada in campu, a pustis unu cuartu de ora s’Italia ndi boddit su gol de tres. Est cuasi oguali a su de unu: tiru de su corrunconi e corpu de conca sempiri de Rabiot. At essi, custu, su gol chi decidit sa partida. In sa parti de s’acabbu una parada de spantu de Maignan, chi sarvat sa porta sua de Kean. Chi s’atacanti de sa Fiorentina iat airi segnau s’Italia, cun su 2-3, at essi passada a is cuartus de finali comenti de prima de su gironi.

Is asulus aici serrant custu gironi cun trexi puntus, is matessis de sa Francia chi, a dogna manera, tenit una diferentzia de gol meglius de cussa italiana. A foras abarrant su Belgiu e Israele. In is dis chi ant a lompiri s’ant a decidiri is partidas chi s’ant a giogai de su 20 a su 25 de martzu. S’Italia at a giogai cun dd’una intru de Germania, Portogallu e Spagna: una meglus de s’atra e po custu at essi dificili. Chi, invecias, iant serrau comenti de primus, is asulus, iant airi tentu una partida prus facili meda.

 

 

 

 

Màuru Mura

 

 

 

Lunis, su dixiotu de Sant’Andria de su 2024

 

 

 

 

Foto: https://www.youtube.com/watch?v=vuuaqbNHiak