Est uficiali un’atera compora po su Casteddu: Semih Kılıçsoy est unu giogadori nou de sa sociedadi ghiada de su presidenti Tomasu Giulini.
S’atacanti turcu, classi 2005 lompit de su finas a s’acabbu de su campionau benienti de Serie A, in segus su Casteddu cun is turcus s’ant torrai a setziri po biri su dde fairi. Is sardus, a dogna contu, s’ant poderau su diritu de ddu comporai in totu.
Nasciu in Istanbul, Kılıçsoy s’est pesau cun is giovunus de su Beşiktaş, aunia giai de su cumentzu at amostau potentzialidadis mannas. In su campionau de is asuta de is 19 annus, in su 2023/2024, at fatu prus gol de totus: giai 42 in 64 partidas giogadas. E, aici, est lompia sa partida de unu in sa Super Lig turca, candu teniat feti 17 annus, contras d su Antalyaspor
Calencunu mesi a pustis, su 27 de triulas de su 2023, fait su primu gol, cussu de su 3-1, in sa partida binda contras de su Tirana in is primas partidas de Conference League. Su noi de gennargiu de su 2024 fait, po sa prima borta, dus gol in sa matessi partida: contras de su Caykur Rizespor, partida binta po 4-0. Su matessi, unu mesi in segus, contras de su Trabzonspor. At bintu cun su Beşiktaş sa Coppa de Turchia de su 2024 e sa supercoppa Natzionali 2025 e lassat sa scuadra turca a pustis airi giogau otantaseti partidas fendu seixi go e noi passagius a is cumpangius po fairi gol.
In is scuadras natzionalis de is giovunus at giogau apetotu, giai de s’Under 14 a s’Under 21, de sa cali est finas diventau capitanu. In totu at giogau trintatres partidas e at fatu bintises gol. S’allenadori italianu de sa sa Natzionali turca, Pissenti Montella, ddu at fatu giogai, po sa borta de unu, contras de s’Italia su 4 de làmpadas de su 2024. E, cun sa Turchia, at finas giogau is Europeus de ocannu passau, imbuchendu in campu in sa partida contras de s’Olanda.
“Kılıçsoy – si ligit in su giassu de su Casteddu – est unu giogadori chi podit giogai in cale chi siat parti de su campu, in a innantis a dogna manera. Est giogadori lestru e abili meda in su sartai s’omini. Su Casteddu, cun Kılıçsoy, pigat unu de is giovunus meglius de su fubalu turcu”.
Màuru Mura
Cenarba su primu de austu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.transfermarkt.com.tr/
