Eris, in cunferentzia stampa in sa Unipol Domus, su Casteddu at presentau a Fabiu Pisacane, allenadori nou de sa scuadra, paris a Guidu Angelozzi, diretori sportivu nou etotu. “Sa vida, prus de una bia, t’arregalat cosas de spantu: custa est una de cussas”, is fueddus de Pisacane in pissu de is dex’annus passaus a intru de sa domu de su Casteddu. Totu est cumentzau, de giogadori, in su 2015. “totus mi eis acumpangiauin custu caminu e scieis beni ca tenia gana de abarrai in custa scuadra chi, po mei, at bofiu sempiri nau ca soi lompiu”.
Po comenti at pigau sa nova, Pisacane est craru: “Ci depit essiri timoria, certu, ma de cussa chi serbit. Timia de non ce dda fairi, ma apu postu custu a un’ala poita est sa matessi de candu m’ant donau sa Primavera a allenai”. Po Pisacane at essi sa prima bia in serie A, a pustis airi bintu sa Coppa Italia, in su mesi de arbili passau, cun is piciocheddus de sa Primavera contras de su Milan. “Ocannu passau apu cicau de donai cussu chi ant donau a mimi: tocat a non si ndi scaresciri ca teneus giogadoris meda chi lompint de is giovanilis.
Cun Pisacane ant a trabbagliai genti chi giai connosciat in is giovanilis, ma lompit finas calencunu de nou: “Apu cicau de sceberai is omini chi, a innantis de totu, ant a cicai de m’agiudai massimamenti comenti de ominis. Ma dapoi, castiendu finas totu is esperentzias fatas, comenti de Jagu Murelli, m’ant agiudai meda in campu.Tengiu ambitzioni manna, ma non soi beniu a fairi su Guardiola. Ma, po chini mi connjoscit, giai scieis ca soi sempiri prontu a trabbagliai e fairi sacrificius po lompiri a s’obietivu. Chi, a totu custu, aciungeis is ideas chi teneus in conca, ocannu chi benit podeus fairi cosas de importu mannu. In is urtimus dus annus, Pisacane, at trabbagliau cun Ranieri e Nicola: “Su Casteddu at umperau su 3-5-2 e su 4-4-2. S’idea mia est de ponni in campu is piciocus aunia s’agatant meglius”.
Màuru Mura
Cenarba, su cuatru de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: chrome-extension://fheoggkfdfchfphceeifdbepaooicaho/html/site_status_block_page.html
