“Eus a preniri totu su paris de sa Striscia de Gaza. Sa decisioni est pigada”. Aici narat unu funtzionariu, chi contat, de s’uficiu de su primu ministru Benyamin Netanyahu in Channel 12.
“Hamas no at a lassai is presoneris chi tenit chena s’arrendiri in totu e nosu de seguru non s’arrendeus po nudda. Chi non si moveus immoi is presoneris s’ant a morri de famini e Gaza at a abarrai suta su cumpudu de Hamas”, sighint a nai is ominis a su costau de su capu de Israele.
In s’ora, in custas oras, prus de centu intru de giornalistas, fotografus e atrus de is “media” ant postu su nomini insoru in dd’unu pedimentu chi narat de “imbucai inderetura, e chena genti chi amostat de sa stampa strangia, in sa Striscia de Gaza”.
Ant postu su nomini is giornalistas, connotus meda, chi trabbagliant po is giornalis de totu su mundu e fait parti de custu Freedom To Report, posta in peis de su fotografu famau Andre Liohn. Intru de sa genti chi non s’est atacada e at post usu nomini finas sa giornalista de Sky News Alex Crawford, su presentadori Mehdi Hasan, Christiane Amanpour e Clarissa Ward, in prus de su fotografu de guerra Don McCullin.
Totu custus torrant a pediri, giai a Israele e giai a Hamas, de podiri imbucai in sa Striscia de Gaza po amostai, chena meris, comenti est andendu sa guerra. Cosa chi non est mai stetia permitia de su cumentzu de su disacatu intru de Israele e Hamas etotu.
In su mentris, s’aministratzioni de is Stadus Unidus, ghiada de Donald Trump, at nau ca no at a donai is agiudus federalis po su sciasciu naturali a is Stadus e a is citadis americanas chi ponint a un’ala is aziendas israilianas. Ddu narat s’agentzia Reuters, tzirmoniendu unu paperi de sa Federal Emergency Management Agency in su cali si narat ca po pigai su dinari tocat a si poderai “is terminis e is cunditzionis”. E, in sa filera de custas cunditzionis is Stadus e is citadis depint amostai comenti no apant frimau “is relatas cumercialis cun is aziendas israilianas”.
Màuru Mura
Martis, su cincu de austu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.terrasanta.net/2023/10/una-nuova-occupazione-di-gaza-israele-sinterroga/
