“Po immoi s’Italia non est in is Stadus cumprumitius, ma is cosas podint mudai”. Ddu fait sciri su presidenti de su Copasir Adorfu Urso (Fradis d’Italia) po cussu chi pertocant is documentus de is Americanus, aunia si narat ca sa Russia iat airi donau prus de 300 milionis de eurus a partidus e ominis poitigus de sonumancu binticuatru Stadus strangius.

“A dogna modu su Copasir s’at atobiai cenarba poita soi cunvintu ca eus a tenni prus novas, at nau Urso chistionendu cun is giorronalistas italianus in Washington, acrarendu ca sa chistioni “at essi castiada ancora meglius cun Francu Gabrielli”.

“In is atobius chi ap’a tenni innoi in Washington, ap’a pediri a is americanus a donai informatzioni su prima possibili a su guvernu italianu”, at aciuntu Urso, pop o difendiri su capu de su partidu suu Giorgia Meloni.

“Cussu chi sartat a s’ogu est ca in Giorgia Meloni tenint fidi, massimamenti a su contu de s’Ucraina. Meloni cussu chi narat, fait, cussu chi impromintit is segus ddu fait. Coerentzia, affidabilidadi e capassidadi de chistionai in manera crara e tunda funt totus cosas chi is americanus apretziant”.

Su ministru de is Esterus Luisu Di Maio, fueddendu in Tagadà in La7 at nau ca is documentus americanuspodint essiri prus de unu e ca Urso “umperat fueddus mesuraus, ma no esistit peruna beridadi, tocat a aspetai galu”.

Su segretariu Erricu Letta de su Pd at pediu “craresa manna” a innantis de is eletzionis: “Is italianus depint connosciri sa beridadi: depint sciri chi c’at partidus chi in custus annusa ant pigau dinari de sa Russia, chi oi est contras su progetu europeu”.

“Is solus chi in tempus passaus ant pigau dinari de is russus funt is comunistas italianus. Deu e sa Lega no eus mai né pediu e né pigau mai dinari. Facant nominis e sangunaus e dd’acabbaus aici!”, is fueddus de Salvini.

 

 

Màuru Mura

 

 

Su 15 de cabidanni de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.agendadigitale.eu/sicurezza/adolfo-urso-al-copasir-che-significa-questa-scelta/