Dominigu, contras de su Casteddu, a is tres de a pustis prangiu in s’Unipol Domus, at essi Franciscu Calzona a si setziri e a cumandai. No est una nova bella po is tifosus de su Casteddu, poita, de sempiri, is allenadoris nous cumentzant beni. Ma Ranieri at a fairi de totu po mudai custa usantzia e guastai sa festa a s’allenadori nou.
Lantiau, in campu e in is intragnas, Walter Mazzarri si nd’andat de Napoli cun dd’una perda in su coru e una pensada in conca: eita podiat sussediri chi iat airi tentu sempiri Victor Osimhen in campu? Est a nai ca s’atacanti nigerianu dd’est mancau comenti su pani a unu mortu de famini o s’abba a unu sidiu. Dd’at tentu feti po cuatru partidas, ma su nigerianu fut giai cun sa conca in sa Copa de s’Africa. E chena de issu est stetiu comenti fairi su chilichiti a is atras scuadras.
Mazzarri, a pustis airi pigau su postu de Rudi Garcia in is mesis passaus, eriseru est stetiu stesiau de su presidenti Aureliu De Laurentis. Non ce dd’at fata a mudai custu campionau de su Napoli e non ce dd’at fata a torrai a donai allirghia.
S’allenadori livornesu pagat sa mancantzia de risultaus e si nd’andat in segus a su paregiu de dominigu passau cun su Genoa. De bonu, beciu “amigu de familia”, comenti at nau De Laurentis, ddu at postu gana, barra e sa faci. Ma no est bastau. Mazzarri est abarrau cun sa schina ereta finas a s’urtima dì, candu at cumandau s’allenamentu de is giogadoris napoletanus, ma fraghendusì ca po issu fut acabbada custa espereintzia. “Mi nci stupat candu at essi totu prontu. At a acabbai comenti cun Garcia, non ap’essi in panchina in sa partida de Champions”, iat airi nau a chini ddi futa canta, comenti narat su giornali “Il Mattino”.
Po Mazzarri non ant fueddau is puntus fatus: feti cuindigi in dogi partidas. Si nd’andant cun dd’unu carignu de De Laurentis: “Est un’amigu stimau, ma a is tifosus de su Napoli tocat de cicai de donai sempiri calencuna cosa in prus”.
Màuru Mura
Martis, su binti de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.strettoweb.com/2024/02/napoli-via-mazzarri-nuovo-allenatore-calabrese-calzona/1678784/
