Cando morit unu poete est comente chi si nd’istudet un’isteddu dae su chelu, umpare a isse morit una parte de s’ànima de unu populu. Sa nova fea de sa dispedida de tiu Bernardu Zizi at postu in anneu sa Sardigna intrea chi po pius de 60 annos at intesu sa ‘oghe sua ammajadora in notes de beranu e de istiu. Naschidu in Onifai su 26 de lampadas de su 1928, tiu Bernardu aiat lòmpidu dae pagu sos 97 annos. Umpare a Marieddu Masala de Silanus est istadu su poete de palcu cun sa carriera pius longa in s’istòria de sa poesia cantada logudoresa. Sa prima gara ufitziale la feteit in Durgale in su 1952 umpare a Totoni Crobu e Pissente Simula, s’ultima in Luras in su 2017 a 89 annos. Una presèntzia subra su palcu chi at sinnadu s’istoria de sa poesia a bolu. No b’at ‘idda in Sardigna chi no apat intesu sa ‘oghe sua. Gai e totu sos tzirculos de sos disterrados sardos ispainados in su mundu, dae sa Germania a s’Australia, dae sa Frantza a s’Argentina. In totue tiu Bernardu si faghiat apretziare pro sa ‘oghe potente e su tragiu dechidu, semper cun su risitu in laras. In sa carriera sua at cantadu meda cun Masala e Pazzola cun sos cales in sos annos ’70 at fatu finas paritzos discos e cassetas. Ma si poden contare a chentinas, manu manu o in tres, finas sas garas cun tiu Peppe Sozu.
Dae sa Baronia si che fit tramudadu in Macumere inue at pesadu sa familia chena mai ismentigare sa ‘idda sua. Famosa est restada sa risposta a Barore ‘Udrone, su poeta de Bunnannaru chi in palcu proaiat a lu leare a ziru pros su logu de sa nadia, atesu dae sas cussorzas de su Logudoro. In –d- una gara in Solarussa a una serrada de ‘Udrone pro sa Baronia (Sindria e melone b’at inie/ e colcorijas mannas che a tie) rispondeit gai:
Si chi so colcoriga as ripitidu
est signu ch’apo d’issa su ritratu
E a Deus li resto semper gratu
ca nessi colcoriga bì at naschidu
ma dagh’a fatu a tie s’est pentidu
ca non s’est resu contu ‘e su ch’at fatu
e dae cando in terra as postu pese
no ischis mancu tue su chi sese
Una manera de cantare chi piaghiat a sa zente. Pro custu sas biddas de Sardigna l’an istrinadu unu tratamentu distintu. Durgale, sa ‘idda de s’esordiu, in su 2015, l’at dadu sa cittadinàntzia onoraria, Fonne in su 2022 su premiu “Fizu de Sardigna”. Cun tiu Bernardu si ch’andat s’ùltimu testimonzu de s’istajone fadada de sas garas. Un’istajone chi at dadu recreu a sas piatas de Sardigna oe costoida in sas registratziones fatas dae sos amantiosos de sa poesia cantada. Una sienda manna pro sos sardos chi an a bennere, unu consolu pro chie patit sa disaura de custos tempos impressidos.
Màuru Mura
Lunis, su cuatru de austu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: Archivio Domus de Janas
