S’est obertu eriseru, in su casteddu de Elmau, in su coru de is Alpis bavaresas, su primu G7 de su cancelieri tedescu Olaf Scholz, meri de domu de s’atobiu chi at a biri intru de is chistionis primas, sa solidariedadi a s’Ucraina in sa gherra cun sa Russia e su pretziu de su gas e de s’energia. In is di de oi – chi est cussa de prus importu mannu – est in programa un’atobiu, in video cun su presidenti ucrainu Volodymyr Zelensky.
In Bloommberg si ligit : “Eus a sighiri a donai agiudu in dogna manera e a abarrai a su costau de s’Ucraina finas a candu c’at essi abbisongiu”.
Màriu Draghi at chistionau nenduru ca finas candu su pretziu de s‘energia at a calai, no at essi possibili “torrai a dipendiri aici meda de sa Russia, comenti de prima”. Tocat “a ndi tirai po sempiri sa dipendentzia nosta de sa Russia” e a su matessi tempus depeus cicai de non faddiri un’atra borta comenti eus fatu cun sa crisi de su 2008: sa crisi de s’energia non depit donai sulidu a is populistas. Teneus is strumentus de ddu fairi: depeus agiudai chini s’agatat in dificultadi e fairi pagai chini godangiat de prus”.
Joe Biden at a sighiri in sa bataglia sua po ponni atras regulas contras Mosca: “Depeus abarrai imparis, in su G7 e in sa Nato” at nau su presidenti Usa. Putin “est in spera chi calencunu in su G7 e in sa Nato si dividat, ma non at a sussediri mai”. Duncas at fatu cumplimentus mannus a Scholz “po su trabagliu chi Berlinu at fatu cun s’Europa po ponni totus a favori de s’Ucraina”.
In d’unu mundu de macus ce dda eus acabada, ma minesceus totu, chena si podiri chesciai. Pagu gana de brullai, cussa chi pariat chi si depiat smorri in pagu tempus est andenduru a innantis, passant is dis, passant is mesis, ma pagu est cambiau: si moriat sa genti e sighit a si morri. Giai at a mudai, totu, ma non scieus chi siat in meglius!
27 de làmpadas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.rainews.it/maratona/2022/06/berlino-apre-a-tetto-sul-prezzo-del-gas-usa-e-gb-bandire-loro-russo-295c5661-4c87-423a-8753-e9d78ecb527e.html
