De s’atru pusti cras, est a nai de cenarba su 9, finas s’Italia at a tirai de is aparechius agiudus po papai in sa Striscia de Gaza. Ddu at fatu sciri su ministru de sa Difesa Guidu Crosetto, in dd’unu paperi, aunia si ligit, intru de atru: “Sighendu s’indicu de su Guvernu, nd’apu pesau una missioni ch iat aponni in mesu s’Esercitu e s’Aeronatica Militari po fairi lompiri benis de abbisongiu primarius a sa genti de Gaza chi, de tempus meda, est sunfrendu. Eus a cumentzai a aprontai sa cosa giai de is oras benientis cun su erribu de una ‘advance party’, chi at aprontai su terrinu paris a is autoridadis de su logu. Is primus viagius ddus teneus prontus e iant a podiri fatus giai a partiri de su noi de austu, poita serbit a su Maeci po preniri sa filera de agiudus de cosa de papai e su lompimentu in Giordania”.
In su mentris, funt 350 is tonnelladas de farra carrigada in is agiudus alimentaris nous de su progetu “Food for Gaza”, in partentzia in custas oras de sa Giordania. Funt binti camion de su “Programma Alimentare Mondiale” carrigus de alimentus comporaus cun dinari italianu. Po sa cida chi lompit si fueddat de un’atru viagiu. Aici, sonumancu, funt is bogis chi lompint de sa Farnesina.
Is agiudus nous italianu prenint su paris de su dinari postu a curriri, sa cida passada intru de s’atobiu cumandada de su ministru de is Esterus, Antoni Tajani, sempiri in sa Farnesina. Is camion ant a sighiri su caminu intru de sa lacana cun sa Cisgiordania, po sighiri, in segus, bia su tremini intru de Israele e Gaza, in su pissu de sa Striscia.
Comenti eus nau a su cumentzu sighint is aprontamentus po is agiudus umanitarius cun is aereus, cun s’agiudu intru de Ministeru de sa Difesa cun su ministeru de is Esterus. Prus de centu tonnelladas de agius funt lompendu in s’aeroportu de Fiumicino. E de innoi ant a sighiri su caminu finas a sa Giordania.
Màuru Mura
Mercuris, su ses de austu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.unicef.it/media/da-copenaghen-a-gaza-il-viaggio-degli-aiuti-umanitari-per-i-bambini-con-maria-copani/
