Funtiri bintitres is giogadoris tzerriaus de Ranieri po sa partida, contras de su Milan de Pioli, de custu meri, chi cumentzat a is ses e mesu, in sa Domus Unipol. S’allenamentu de eris a mericeddu at torrau a portai in sa truma Di Pardo e Pavoletti, in mentris chi abarrant a un’ala Mancosu cun Jankto, chi ant trabagliau a parti e sa spera insoru est de podiri torrai po sa partida de lunis chi benit in Firenze cun sa Fiorentina. In domu abarrant ancora una bia Lapadula, Rog, Capradossi, Pereiro et Desogus. Torrat a dispositzioni Wieteska, chi in Bergamo cun s’Atalanta no at giogau po mori ca fut scualificau po candu ce dd’ant bogau contras de s’Udinese sa partida ainnantis.
Po sa partida cun su Milan sa Domus at essi prena che un’ou po sa borta de duas, c agiai contras de s’Inter, in sa partida perdia po 2-0, fut ateretantu prendu. Giumpada sa cuota de seximila presentzia, abarrant a dispositzioni ancora prus o mancu trexentus biglietus. Is cancellus de su stadiu, bistu ca at a lompiri aici genti meda, ant essi obertus giai de is cuatru e mesu e in su mentris in su stadiu non s’at a podiri comporai su biglietu.
Sa partida est de importu mannu po ambas is scuadras, po su Milan ca non si bolit stesiai de s’Inter prima in classifica e po su Casteddu ca po immoi tenit feti dus puntus in classifica e cumprendit ca tocat a cumentzai a binciri calencuna partida. Eus benni a biri chini at a tenni prus gana de gherrai po binciri custa cuntierra. De seguru oi su Casteddu non tenit nudda de perdiri, finas chi a medas at a parriri de scalai unu monti artu meda a peis scurtzus.
Custus is giogadoris tzerriaus de Claudiu Ranieri:
Portieris: Radunovic, Scuffet, Aresti;
Difensoris:Dossena, Wieteska, Hatzidiakos, Obert, Goldaniga, Zappa, Di Pardo, Augello, Azzi;
Giogadoris de mesu campu: Nandez, Makoumbou, Sulemana, Viola, Deiola, Prati;
Atacantis: Petagna, Pavoletti, Luvumbo, Shomurodov, Oristanio.
Màuru Mura
Mercuris, su bintiseti de Cabidanni de su 2023
Foto: https://tribuna.com/it/blogs/a8fdbce5-7345-4a85-97c1-83ade678188c/
