A pustis chi in is dis passadas, su presidenti de is Stadus Unidus Donald Trump, iat nau ca no iat airi mandau prus armas in Ucraina, su matssi at impromintiu ca is armas ant a lompiri in Ucraina poita “si depit difendiri”. Vladimir Putin “narat una meca de catzdas, est bocendu tropu genti”, aici, in manera crara e chena mesus fueddus, Trump incurpat a su capu de sa Russia Vladimir Putin. E chi non bastat fueddat finas de amelessus po sa Russia, comenti cussu de atras santzionis. E, su torrai a palas de sa Domu Arva, no est pragiu meda a su Cremlinu. A su matessi tempus, in is personis chi acostaiant su presidenti de s’Ucraina Volodymir Zelensky, no funt aici segurus de su lompimentu de is armas de Washington: su numuru de is Patriot, chi tenint a disponimentu, est sempiri prus basciu.
Donal Trump, in s’urtima telefonada intru de issu cun Zelensky, iat giai in parti assegurau su presidenti ucrainu in pissu de is agiudus militaris, nendu ca issu no iat decidiu nuddu in pissu de su frimamentu de is armas. S’asseguratzioni ca is Stadus Unidus no ant a lassai a un’ala Kiev e s’Ucraina a su distinu insoru, est lompia de su matessi Trump arrespundendu a is giornalistas, intru de sa bisita de Benyamin Netanyahu. “Eus a mandai atras armas. Ddu depeus fairi. Si depint difendiri poita oi ndi benint boddius in manera tostada meda”, is fueddus de Trump. e po cantu pertocat Putin: “Non soi po nudda cuntentu e allirgu. Soi deludiu ca non si siat frimau e sigat a bociri genti meda de s’Ucraina”.
Po cussu chi narat Axios, chi non scoviat de chini ddu at scipiu, Trump iat airi impromintiu de donai inderetura dexi “intercetoris, a Zelensky e at cumentzau a chistionai finas cun sa Germania, chi est pensendu de comporai atrus missilis Patriot de is americanus. Po Zelenky est de fundamentu mannu chi lompant is missilis.
Màuru Mura
Martis, s’otu de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.lastampa.it/esteri/2024/11/18/news/biden_missili_lungo_raggio_ucraina_cosa_succede-14814783/
