At essi su Manchester City a si giogai sa finali de sa Champions League cun s’Inter su dexi de làmpadas in Istanbul. S’Inter dì innanti de eriseru iat fatu foras su Milan bincendu po 1-0, gratzias a su gol de Lautaro Martinez. Eriseru, invecias sa scuadra de Guardiola at postu is cosas in craru, chena problema perunu e, a pustis s’1-1 de sa partida de Madrid, at bintu cun su Real Madrid po 4-0. Parit unu risultau spantosu, ma, po chini at bidu sa cuntierra, aici no est. Sa scuadra inglesa at donau spetaculu in campu e non fut mancu gioghendu cun sa prima scuadrigedda chi si connosciat. Difatis su Real est una de is scuadras prus famadas e prus fortis de totu su mundu. Tenit totu, ma eris is piciocus de Guardiola iant airi bintu contras de su Tiaulu puru.

Sa partida s’est decidia in pagu tempus, giustu una mesoredda. Is piciocus de Ancelotti funt abarraus in is aposentus de su spogliatoiu e ant resistiu po trinta minutus feti gratzias a is paradas de Courtois. In segus c’at pensau Bernardo Silva chi, intru de su minutu bintitres e cussu de trintaseti, at fatu dus gol. Sa reatzioni de su Real no est mai lompia, e in su tempus de dus sa scuadra de Guardiola at serrau is contus a innnatis cun Militao, chi c’at betau sa bocia in sa porta sua, e, dapoi, cun d’unu gol de su campioni de su mundu argentinu Julian Alvarez, chi fut imbucau in campu pag’ora prima.

Una partida chi no at tentu storia, de su cumentzu a s’acabbu. Is interistas chi ant castiau, cun interessu mannu, sa partida de eris a merì si funt arriolaus meda. Difatis fut de tempus meda chi non si biat una scuadra, su City, aici forti e tostada. Ant giogau a fubalu comenti si podit giogai feti in su celu. Ma sa bocia, at essi banali a ddu nai, est tunda e podit arregalai novas bonas. Certu ca a castiai sa partida de eris cun cussa de dì innanti non ddue at paragoni.

Inzaghi chi est omini sabiu at essi giai studiendu is aversarius, Guardiola at essi fendu su matessi. Eus a benni a biri chini at essi prus bravu.

 

 

Màuru Mura

 

 

Giobia, su 18 de maju de su 2023

 

 

Foto: https://www.goal.com/it/notizie/regolamento-champions-league-diffidati-e-squalificati-come-funziona/1hfee8txckq921mlubfaacahkq