Est acabbada et est addurada po prus de duas oras sa telefonada intru de su presidenti de sa Russia, Vladimir Putin, cun su presidenti de is Stadus Unidus, Donald Trump. Su presidenti russu at chistioanu de sa ciaciarrada, nendu ca est stetia “de significu, onesta e chi at a serbiri meda”, at fatu sciri s’agentzia de stampa Ria Novosti. Putin at chistionau de una scola de musica aunia est lompiu, po dda batiai, in Sochi.
Una ciaciarrada atendia meda, massimamenti a sa lugi de is chistionis, de sa cida passada, in Istanbul, aunia su presidenti de is Stadus Unidus at cicau de cumprendiri cali funt is pensadas de Putin po cantu pertocat unu acordiu de pagi chi durit.
Sempiri su presidenti russu, Vladimir Putin, at nau ca intru de sa ciaciarrada, Donald Trump at scoviau sa pensada de Washington po acabbai de ndi pesai fogu. Su matessi Putin at finas torrau gratzias a su capu de sa Domu Arba po airi fatu torrai a pigai is tratavivas intru de Russia e Ucraina e at nau ca si podit lompiri a un’acordiu de pagi cun “acordius giustus” e ca sa cosa prus de importu po Mosca est “a ponni a un’ala is arregionis de fundu” de sa guerra cun s’Ucraina.
A innantis e inderetura a pustis s’acabbu de sa telefonada intru de is dus presidentis, Trump at finas fueddau, ma po una pariga de minutus, cun su presidenti ucrainu Zelensky. Cussa de eris est sa chistionada de cuatru, po telefunu, intru de Putin e Trump chi, in is Stadus Unidus de America, narant sempiri chi “non bit s’ora” de lompiri a unu acordiu de pagi. Est a nai ca Trump, sempiri po cussu chi narant in America, parit deludiu meda po comenti funt andendu is cosas, ca parint sempiri frimas.
De sa pensada intru de un’atobiu faci a pari, de su cali si fueddat de tempus meda, su portabogi de su Cremlino, Dmitry Peskov, at nau ca “in cust’ora non ddu seus aprontendu”.
Màuru Mura
Martis, su binti de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.france24.com/en/live-news/20250519-trump-to-hold-call-with-putin-in-push-for-ukraine-ceasefire
