Est Gennaru Borrelli, sa prima compora de su Casteddu po su campionau de ocannu chi benit. Borrelli est finas sa prima compora de su diretori sportivu nou Guidu Angelozzi, Borrelli, chi est nasciu in su 2000, lompit in Casteddu chena dinari po sa compora, po mori ca fut abarrau chena de scuadra po su fallimentu de su Brescia, chi fut in poderi de su presidenti Massimu Cellino. Po Borrelli, su Casteddu, at coidau de prus ca ddue funt atras scuadras medas, finas de serie A, interessadas a sa compora de su centravanti. Borrelli, chi at abarrai in Sardigna po cuatr’annus, aici narat su paperi, at a fairi sa esperientzia de duas in sa Serie A. Sa de unu dda iat fata in su Frosinone, chi teniat Angelozzi comenti de diretori sportivu, candu iat giogau feti una bia contras de su Napoli su 19 de austu de su 2023. In su campionau de ocannu passau, gioagau cun su Brescia in sa serie B, Borrelli at fatu ses gol in trintacuatru partidas giogadas e finas unu gol, in pissu de duas partidas giogadas, in sa Coppa Italia.
Serrada sa compora de Borrelli, immoi su Csteddu est trabbagliendu po ddi fairi sa bisita medica. Cras at essi sa dì, candu finas su Casteddu s’at a agatai in su Crai Sport Center de Assemini. Dapoi is piciocus de Pisacane ant a moviri in Ponte di Legno aunia ant abarrai finas a dominigu 22 de triulas.
In su mentris chi lompit Borrelli, partit po Palermo, in serie B, Tomasu Augello chi, comenti at nau in is dis passadas: “Bòlia abarrai ma su Casteddu at sceberau atrus caminus”. Augello, nasciu in su 1994, fut lompiu in Casteddu in s’istadi de su 2023 de sa Sampdoria, bofiu de Claudiu Ranieri, chi ddu ia tentu comenti de giogadori in sa matessi scuadra de sa Liguria. Cun sa maglia de su Casteddu, Augello, at giogau po setantacuatru bias, fendu finas unu gol. Augurius mannus a Augello chi at minesciu su beni de is tifosus.
Màuru Mura
Mercuris su noi de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://sport.virgilio.it/calcio/giocatori/gennaro_borrelli/
