Benjamin Netanyahu, chi fut a cena in sa Domu Arva paris a su presidenti de is STadus Unidus Donal Trump, at nau de airi candidau su matessi a su Nobel po sa pagi.
Su capu de Israele at donau a su presidenti de is Usa una litara chi at mandau a sa giuria de su premiu: “Est fraighendu sa pagi in su mentris chi nosu fueddaus, in dd’una Natzioni, in una regioni a pustis de s’atra”, at nau Benjamin Netanyhau intru de mesu de sa cena cun Trump.
E su matessi Trump sighi a si candidai a sa sola: “Apu frimau cincu Natzionis chi si boliant fairi sa guerra”, at nau arregodendu is acordius chi at postu in peis intru de su Congo e su Ruanda, India e Pakistan. “E, invecias, su premiu ddu at a binciri unu professori chi nemus connoscit”.
Cussa chi depiat essiri una cena intru de amigus a s’acabbu s’est oberta a is giornalistas. S’est chistionau de aunia ponn is palestinesus: “Seus agiudendunosì cun is Stadus Unidus, po agatai Natzionis aunia possant biviri is sfollaus”, at nau sempiri Netanyahu.
“S’agatat genti – at spiegau – chi bolit abarrai o podit abarrai, ma chi si ndi bolit andai, ddu iant a podiri fairi. Non depit essiri unu presoni. Depit essiri unu logu obertu e si depit donai a sa genti sa libertadi de sceberu. Seus trabbagliendu a su costau cun is Stadus Unidus po agatai altras Natzionis chi ant a cicai de ponni in peis cussu chi narant de sempiri. Chi bolint donai a is palestinesus unu benienti meglius e creu chi nosi seus acostiendu a agatai atras Nationis. Est a nai ca eus tentu unu agiudu mannu de is Natzionis lacanantis e soi cunvintu ca calencuna cosa de bonu at a sussediri”.
Dapoi, su matessi capu israilianu at nau, in manera crara ca Gaza at a abarrai in manus de Israele: Creu chi is palestinesus depint tenni totu is poderis po si guvernai a sa sola, ma nemus de custus poderis depit essiri unu amelessu po nemus”.
Màuru Mura
Lunis, su seti de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://italia-informa.com/netanyahu-trump-nobel-grottesco-o-collasso-etico.aspx
