Sa presidenti Todde pongiat in is suas s’assessora Desirè Manca. Custu su significu de una litara de cuindixi consiglieris regionalis de s’opositzioni a pustis calencuna dì de sa sa cuntierra intru sa matessi assessora e is sindigus, rapresentaus de sa presidenti de s’Anci, e sindiga de Fonne, Taniela Falconi.
Sa cuntierra intru de is duas fut nascia in segus de s’atobiu mai fatu in pissu de is centrus po su trabbagliu e de s’Aspal. S’assessora, chi sighit propriu su trabbagliu, at incurpau is sindigus de non s’essiri amostaus a fueddai de una chistioni de importu mannu comenti cussa de s’ocupationi. Is sindigus, invecias, ant nau sa insoru fueddendu pagu arrespetu istitutzionali e de cumbidu non erricius, ma massimamenti mancu mandaus. A s’acabbu de sa cuntierra ambas is partis ant pediu is scusas formali: una a s’atra!
“Po una cosa de nudda ant fraigau totu in dd’una cuntierra istitutzionali chi non si podit creiri, chena significu e perigulosu meda”, atacant Paulu Truzzu, Emanueli Cera, Antoneddu Floris, Francisca Masala, Corradu Meloni, Faustu Piga e Cristina Usai de Fradis de s’Italia; Francu Mula, Gigi Rubiu e STevini Schirru de Alleantzia Sardigna – Partidu Liberali Italianu; Umbertu Ticca, Giusepu Fasolino e Ardu Salaris de is Riformadoris Sadus; Arbertu Urpi de Sardigna a su Centru – 20venti; Alissandru Sorgia de sa Truma Imbestia.
Sa litara sighit: “Iat essi cosa beni fata chi s’assessora bengiat lamada a sighiri su sensu de is istitutzionis e a s’arrespetu de is basis istitutzionalis, sa prima cosa chi si depit fairi est cussa de s’agiudai unu cun s’atru e non a fairi guerras po si ponni in pumus artus”.
Po is consiglieris de s’opositzioni Manca iat airi mudau totu in dd’una cuntierra aunia sa genti chi dda sighit in is social ant cumentzau a scriri contras de is sindigus. E a is matessis consiglieris no est po nudda pragiu a si dd’airi pigada cun sa Presidenti de s’Anci, a sa cali, est a nai s’assessora Manca at pediu scusa publicamenti.
Màuru Mura
Mercuris, su dixiannoi de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sardegna/notizie/2023/04/28/regionali-nasce-comitato-desire-manca-presidente_70288bb6-4798-40ce-8112-e69048d243d2.html
