Est sussediu comenti in sa partida in Pesaro: sa Torres bincit contras de sa Vis candu sa partida fut acabendu. Difatis Diakite, cun dd’unu corpu de conca a su minutu de norantatres fait binciri is sassaresus. Cun custa vitoria po 1-0 s’afortiat su postu de dus in sa classifica, sempiri chiada de su Cesena, poita sa Carrarese, chi est cussa de tres, est stetia frimada de sa Spal in Ferrara: feti unu puntu po is toscanus in dd’una partida acabbada po 0-0.
Est a nai ca no est stetia una partida facili po is piciocus de Greco. In sa parti de unu, massimamenti in sa prima mesoredda de giogu sa Torres iat airi minesciu sonumancu unu gol, ma su portieri de sa Vis Pesaro, in prus de una bia at pfatu paradas spantosas. Invecias in sa parti de dus no est andada beni meda, ma si scit de sempiri ca su fubalu no est sport aunia chini giogat meglius bincit.
A pustis de tres minutus ocasioni manna po sa Torres: de su portieri Zaccagno sa bocia lompit a Fischnaller chi tirat beni, ma su portieri parat ancora meglius. Passant dus minutus e custa bia est Ruocco, imbuchendu de sa parti manca de is seixi metrus, a s’acostiai a su gol: galu bravu Neri a parai. Is bocias prus perigulosa su portieri de sa Vis Pesaro, lompint una in fatu de s’atra in ses minutus: in cussu de bintiseti, Neri est spantosu meda candu tirat Zecca e aici etotu candu parat unu tiru de Cester a su minutu de bintotu. Ma s’ocasioni prus manna de sa parti de unu est po is strangius, candu Karlsson, cun d’unu tiru forti ndi boddit sa traversa. Zaccagno non iat airi possiu fairi nudda chi sa bocia fut prus bascia.
In sa parti de dus imbucat inderetura Scotto e ci bessit Cester, ma su primu perigulu ddu portat a innantis sa Vis Pesaro cun Pucciarelli chi andat acanta de segnai. In segus sa partida si fait legigedda, ma candu totus creiant chi essit acabbada cun dd’unu puntu po cadunu, su corpu de conca de Diakite, lompiu de una bocia fuliada in mesu de Giorico, fait allirgai totu su Vanni Sanna.
Màuru Mura
Dominigu, su binticuatru de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=2A7CbP0D5_0
