A s’Italia s’Ucraina pedit armas po si difendiri de is atacus de is aparechius russus, narat su presidenti Volodymyr Zelensky. E riferit de sa ciaciarrada, po telefunu, cun Giorgia Meloni: “At nau ca est a favori a is agiudus de sa Ue e at assegurau s’agiudu de s’Italia a s’invasioni russa”.
Dd’at cumbidada fintzas in Kiev: “E issa at nau ca at a benni”. “Creu chi eus fraigau una grandu bella relata comenti cussa chi teniaus cun Draghi”, narat su presidenti ucrainu in d’una intervista a su Corriere della Sera. A chini narat ca tocat a Kiev a cicai sa pagi, Zelensky narat de airi sempiri bofiu fueddai, “ma non cun d’una pistola puntada a conca”.
In su fratempus si sighit a chistionai de s’amelessu de sa “bomba sporca”, unu mesturamentu de esplosivu e materiali radiuativu chi fait erriscai meda comenti tocat terra, ma sa radioatividadi est bascia meda. Est prus un’arma psicologica, chi fait a timiri sa genti e fairi sartai su sistema economicu e sanitariu, chi de un’arma de distrutzioni.
Po Mosca est custu s’amelessu chi Kiev est progeterendu. Feti sa Russia, arrespundit su presidenti ucrainu Volodymyr Zelensky, iat essi capassa de fairi cosas aici. In su mentris is ministrus de is esterus de sa Francia, de s’Inghilterra e de is Stadus unidus narant totu paris ca non s’ant a fairi frigai de is novas russas chi funt fartzas. “Is logus aunia s’agatat su nucleari de s’Ucraina funt obertus a s’Agentzia internztzionali po s’energia atomica, est facili a s’assegurai chi is fueddus russus funt fartzus”, at nau su ministru de sa difesa Ucraina Oleksiy Reznikov. Invecias su ministru de is Esterus Dmytro Kuleba at pediu a su capu de sa matessi Aiea Rafael Grossi (chi at acetau) de mandai ispetoris in is impiantus nuclearis de su Stadu.
Po su segretariu generali de sa Nato, Jens Stoltenberg, is fueddus russus in pissu de sa “bomba sporca” funt sciollorius, e Mosca “incurpat is atrus de cusssu chi iat bolli fairi cussa”.
Màuru Mura
Martis, su 25 de mesi de talamini de su 2022
Foto: https://www.la7.it/la7retweet/scambio-di-messaggi-sui-social-tra-zelensky-e-meloni-congratulazioni-puoi-contare-su-di-noi-27-09-2022-453424
