“E chi pensaus de fairi in Sant’Elia un’atra spiagia?”. Massimeddu Zedda dda narat aici, in s’orruga intregada a s’Emilia, aunia su Campu Largu s’est atobiau po scoviai su progetu chi at acumpangiat sa candidadura sua po fairi su sindigu sa bia de tres in Casteddu, a pustis su 2011 e su 2016. A su costau de Zedda, su meri de domu, Guidu Portoghese, segretariu de su Partidu Democratigu in citadi, e prus stesiada sa presidenti de sa Regioni Alissandra Todde. E ancora, a una parti de Zedda e a s’atra de sa matessi Todde, is alleaus.
Su candidau sindigu, non chena emotzioni, at chistionau po unu cuartu de ora nendu is pensadas suas po sa citadi. Cun dd’una impromintzia: “A pustis chi lunis sa coalitzioni at donau s’indicu po mei comenti de candidau sindigu de Casteddu, apu tzerriau a sa presidenti Todde e nosi seus naus comenti Casteddu e sa Citadi Metroplitana possant agiudai sa Regioni e su imbessi”.
Zedda at, duncas, nau ca sa capitali sarda depit diventai sa citadi de sa pagi in su Mediterraneu.
Po is problemas de dogna dì in Casteddu, a cumentzai de is parchegius: “In sa zona de via Roma ci funt tres assessoraus regionalis, cussu de sa sanidadi de s’ambienti e de su turismu, chi si poderant postus fissus medas. A pusti prangiu e in s’acabbu de cida podint essiri umperaus in manera diversa”.
Zedda at in segus fueddau de is atrus obietivus chi tenit: “Fairi lompiri dinari e difendiri chini trabbagliat giai in citadi. Depeus torrai a fraigai sa citadi de sa cultura, de is spetaculus, de is eventus. Tocat a donai una cualifica a sa zona de su portu e sa nautica est unu de is settoris chi depit cresciri e po custu boleus portai s’America’s cup in Casteddu”. Ma non si frimant a custu is pensadas de Massmo Zedda, ca at finas chistionau de istrutzioni, sport, stadiu nou e vibilidadi.
Màuru Mura
Giobia, su dixiotu de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sardegna/notizie/2024/04/15/massimo-zedda-candidato-sindaco-del-centrosinistra-a-cagliari_10f1e2b5-3db0-44c0-b591-23a24c6dd661.html
