Su Casteddu comporat su portieri albanesu Alen Sherry, chi lompit de su Egnatia in totu e s’ata a frimai in Sardigna finas a su trinta de làmpadas de su 2027. At essi su segundu de Scuffet, in su mentris chi Radunovic iat depiri moviri o a su Bari de Moreno Longo o a su Pisa de Pippo Inzaghi.
Su Casteddu, in is paginas de su giassu ddu fait connosciti a is tifosus. Sherri, nasciu in Scutari in su 1997, s’est pesau in is scuadras de is giovunus de su Vllaznia, gioghendu sa partida de unu cun sa scuadra de is mannus su 12 de arbili de su 2015, candu teniat feti dixiaset’annus, contras de su Tirana. In s’istadi de su 2020 est moviu bia su Laci, sempiri is su matessi campionau albanesu e in dus annus at giogau cincuantatres partidas intru de campionau e cualificatzionis po is copas europeas.
A sighiri su lompimentu in su Egnatia, cun sa cali at bintu sa copa albanesa 2022-23 e, ocannu passau, at bintu sa matessi copa cun, in prus, su campionau albanesu. A pustis airi giogau cun is scuadras de is giovunus de sa Natzionali albanesa, su noi de Sant’Andria de su 2022 at giogau, po sa borta de unu, intru de is palus de sa Natzionali de is mannus.
In su fratempus sa scuadra de Davidi Nicola eris at trabbagliau a s’atacada po preparai sa partida contras de su Como, chi est intru de amigus ma at a serbiri po biri in cali cunditzionis funt is piciocus. Est a nai ca Lapadula est curau de su dolori de brenti chi teniat e Piccoli cun Adopo, una borta chi s’allenamentu fut acabbau e is cumpangius insoru funt samunendusì, funt abarraus in campu po s’alelnai cun sa bocia.
Oi, a is cincu de pustis prangiu, duncas, su Casteddu at a giogai una partida, chi non contat, ma est intendia meda, cun su Como de Fabregas. Est de arregodai ca in sa scuadra lariana s’agatant dus giogadoris, Dossena e Goldaniga, chi furint de su Casteddu finas a tempus pagu.
Màuru Mura
Giobia, su binticincu de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.diyticket.it/events/sport/18088/cagliari-como-partita-amichevole
